Xorijda o‘zbek restorani ochgan tadbirkorlar xarajatlarining 50 foizigacha qismini qaytarib olishi mumkin
Xorijda o‘zbek milliy taomlari restoranini ochgan tadbirkorlar xarajatlarining 50 foizigacha qismini davlat subsidiyasi sifatida qaytarib olishi mumkin. Arizalar my.gov.uz orqali qabul qilinib, 18 ish kunida ko‘rib chiqiladi, agar ma’qullansa 7 ish kuni ichida tadbirkorning bank hisobvarag‘iga o‘tkaziladi.
Xorijda o‘zbek restorani ochgan tadbirkorlar xarajatlarining 50 foizigacha qismini qaytarib olishi mumkin
O‘zbekistonda ro‘yxatdan o‘tgan tadbirkorlar xorijda o‘zbek milliy taomlari restoranini tashkil etish bilan bog‘liq xarajatlarining 50 foizigacha qismini davlat subsidiyasi sifatida olishlari mumkin.
Buning uchun Turizm qo‘mitasi my.gov.uz portali orqali bepul xizmat ko‘rsatadi.
Subsidiya olish uchun restoranning xorijda ro‘yxatdan o‘tgani, binoga egalik qilish yoki undan foydalanish huquqini tasdiqlovchi hujjatlar, sanitariya va yong‘in xavfsizligi talablariga muvofiqlik, amalga oshirilgan xarajatlar, shuningdek zaruratga ko‘ra O‘zbekistondan mahsulot yetkazib berilganini tasdiqlovchi hujjatlar taqdim etilishi lozim. Bundan tashqari, restoranning ichki va tashqi ko‘rinishi aks etgan fotosuratlar ham talab qilinadi.
my.gov.uz orqali yuborilgan ariza 18 ish kuni ichida ko‘rib chiqiladi, ijobiy qaror qabul qilingach esa subsidiya mablag‘lari 7 ish kuni ichida tadbirkorning bank hisobvarag‘iga o‘tkaziladi. Arizada kamchiliklar aniqlansa, ularni bartaraf etib, hujjatlarni qayta topshirish mumkin.
Bunga huquqiy asos sifatida Vazirlar Mahkamasining 2026-yil 9-sentabrdagi 482-son “Mehmonxona, umumiy ovqatlanish korxonalari va restoranlarning o‘z faoliyatini targ‘ib qilish hamda xorijda o‘zbek milliy taomlariga ixtisoslashtirilgan restoranlar tashkil etgan mahalliy tadbirkorlarni qo‘llab-quvvatlash chora-tadbirlari to‘g‘risida”gi qarori keltirilgan. Biroq qaror Qonunchilik ma’lumotlari milliy bazasida e’lon qilinmagan.