Xivada birinchi xalqaro Mercure mehmonxonasi ish boshladi
Xivada mintaqadagi birinchi xalqaro mehmonxona brendi — Mercure ish boshladi. Loyihaga 26 mln dollar investitsiya kiritildi.
Xivada birinchi xalqaro Mercure mehmonxonasi faoliyat boshladi
Xorazm viloyatining Xiva shahrida Mercure mehmonxonasi ishga tushdi. Shu tariqa u mintaqadagi birinchi xalqaro mehmonxona brendiga aylandi. Mehmonxona qurilishiga 26 million dollar investitsiya yo‘naltirildi va 200 ta yangi ish o‘rni yaratildi.
Mehmonxona 145 ta xonaga mo‘ljallangan bo‘lib, bir vaqtning o‘zida 300 nafargacha mehmonni qabul qila oladi. Obyektni barpo etishda tarixiy Xiva muhitiga mos tushishi uchun milliy va zamonaviy uslublar uyg‘unligidan foydalanilgan.
Mehmonxonaning ishga tushirilishi Xorazm viloyatidagi mehmonxona infratuzilmasini kengaytiradi hamda sayyohlarni qabul qilish uchun qo‘shimcha imkoniyatlar yaratadi. Xalqaro brendning paydo bo‘lishi Xorazm vohasining turistik salohiyatini yanada rivojlantirishga xizmat qilishi kutilmoqda.
Xalqaro mehmonxona brendlarining mintaqaviy bozorga kirib kelishi xorijiy sayyohlarni, jumladan, yuqori xarid qobiliyatiga ega sayohatchilarni jalb etishda muhim ahamiyatga ega. Joylashish uchun mehmonxona tanlashda xorijlik mehmonlar ko‘pincha avvaldan ishonch bildirgan mashhur mehmonxona tarmoqlariga e’tibor qaratadi.
Mehmonxona infratuzilmasining rivojlanishi bir vaqtning o‘zida turizm sohasida xizmat ko‘rsatish sifati ahamiyatini ham oshiradi.
Xivada Mercure mehmonxonasining ochilishi mehmonlarni qabul qilish va mintaqaning turistik salohiyatini yanada rivojlantirish uchun qo‘shimcha sharoitlar yaratadi.