Xitoylik olimlar quloqchindagi ovozni devor ortidan ham eshitish usulini topdi
Xitoylik olimlar quloqchindagi tovushni devor ortidan ham eshitish usulini aniqladi
Xitoylik tadqiqotchilar elektromagnit ta’sir yordamida oddiy elektronikadan tovush va boshqa analog signallarni ushlab qolish usulini ishlab chiqdilar. InjectEave deb atalgan bu usul quloqchinlardagi tovushni 30 metrgacha bo‘lgan masofadan, jumladan devorlar orqali ham tiklash imkonini beradi.
Yon elektromagnit kanallar orqali amalga oshiriladigan odatiy hujumlardan farqli ravishda, InjectEave qurilmaning juda kuchsiz nurlanishini shunchaki tutib olishga urinmaydi. Buning o‘rniga, ehtimoliy hujumchi o‘zi 0 dan 9 MGts gacha bo‘lgan diapazondagi radiosignalni uzatadi — ish mualliflari uning aniq parametrlarini oshkor etishmagan. Bunday signal qurilmaning nochiziqli elektron komponentlari bilan o‘zaro ta’sirlashib, foydali analog signalning qabul qilish uskunasi orqali qayd etish mumkin bo‘lgan shaklda sizib chiqishiga sabab bo‘ladi.
“Bizning InjectEave loyihamiz shuni ko‘rsatadiki, radiochastota signallari oddiy quloqchinlardan axborot sizib chiqishiga olib kelishi mumkin, bu esa hujumchiga 30 metrgacha bo‘lgan masofadan, shu jumladan devorlar orqali ham eshittirilayotgan tovushni tiklash imkonini beradi”, deydi Guanchjoudagi Gonkong fan va texnologiyalar universiteti dotsenti Yan Lun.
Usul deyarli hamma joyda uchraydigan nochiziqli komponentlar: kuchaytirgichlar, analog-raqamli o‘zgartirgichlar, quvvat o‘zgartirgichlari va kalitli MOSFET-tranzistorlar hisobiga ishlaydi. Kiritilgan radiosignalning elektronika bilan o‘zaro ta’siri aslida boshlang‘ich signalni — masalan, quloqchinlardagi tovushni modulyatsiya qiladi, shundan so‘ng uni tashqaridan aniqlash osonlashadi.
Tadqiqotchilar InjectEave’ni 11 ta seriyali qurilmada sinovdan o‘tkazishdi. Ular orasida Sony ZX110AP va Apple Earbuds simli quloqchinlari, Ugreen MAX2, Philips TAH2020 va HP H231R simsiz modellari, Flyingvoice P23GW VoIP-telefoni, OIDIRE ODI-MF10A va Xiaomi BPLDS10DM aqlli ventilyatorlari, shuningdek, JINGZAO JDO-06 va Xiaomi 1S lampalari bor.
Sinovdan o‘tkazilgan qurilmalarning aksariyati uchun maksimal masofa taxminan bir metrdan olti metrgacha bo‘lib, tovushni hatto devor orqali ham tutib olish mumkin edi. Qo‘shimcha radiochastota kuchaytirgichi yordamida o‘tkazilgan alohida tajribada tadqiqotchilar quloqchinlardan 30 metrgacha bo‘lgan masofadan aniq tovushni tiklashga muvaffaq bo‘lishdi. Shuningdek, ular uskunani mehmonxona xonasi yonidagi chamadonga yashirish yoki ofis mebeli ichiga o‘rnatish mumkin bo‘lgan ssenariylarni ham namoyish etishdi.
Hujum uyushtirish uchun maxsus laboratoriya talab etilmaydi. Mualliflar dasturiy ta’minot orqali boshqariladigan USRP B210 radiotizimi, signalni uzatish va qabul qilish antennalari, Siglent SSA3075X Plus spektr analizatori va noutbukdan foydalanishgan. Radiochastota kuchaytirgichi faqat masofani uzaytirish uchun kerak xolos.
Qo‘llanish doirasi faqat yashirincha tinglash bilan cheklanmaydi. Tadqiqotchilarning so‘zlariga ko‘ra, shunga o‘xshash usul yordamida aqlli lampalar va ventilyatorlarning boshqaruv signallari hamda energiya sarfini tahlil qilish, shu orqali xonadagi odamlarning harakatlarini ehtimoliy jihatdan aniqlash mumkin.
Hujum xavfini apparat vositalari — ekranlash, filtrlash va eshilgan juftlik kabelidan foydalanish orqali kamaytirish mumkin. Biroq tadqiqotchilarning ta’kidlashicha, bunday choralar faqatgina tajovuzkorning ishini qiyinlashtiradi xolos va to‘liq himoyani kafolatlamaydi.