Xitoylik 13 yoshli suzuvchi qiz Osiyo o‘yinlarida rekord o‘rnatdi

Xitoylik 13 yoshli suzuvchi qiz Osiyo o‘yinlarida rekord o‘rnatdi

Xitoylik 13 yoshli suzuvchi Yu Zidi 2026-yilgi Osiyo o‘yinlarida ketma-ket ikkinchi kun oltin medalni qo‘lga kiritib, yana bir rekord qayd etdi. U ayollar o‘rtasidagi 200 metrga kompleks suzish bahsida 2 daqiqa 6,10 soniya natija ko‘rsatdi. Bu ko‘rsatkich Osiyo o‘yinlari rekordiga aylandi.

Yu Zidi 16-oktyabr 2012-yilda Xitoyning Baoding shahrida tug‘ilgan. U olti yoshida otasi bilan suv parkiga borganda murabbiy e’tiboriga tushgan va shundan keyin suzish bilan shug‘ullana boshlagan.

Sportchi Osiyo o‘yinlaridagi debyutini muvaffaqiyatli o‘tkazmoqda. U bir kun avval 200 metrga batterflay usulida suzishda 2:05,08 natija bilan oltin medalni qo‘lga kiritib, musobaqa rekordini yangilagan edi.

200 metrga kompleks suzish finalida Yu Zidi jamoadoshi Yu Yitingni ortda qoldirdi. Yiting 2:07,99 natija bilan ikkinchi, yaponiyalik Mio Narita esa 2:10,40 natija bilan uchinchi bo‘ldi.

Yangi rekord Yu Zidini ushbu yo‘nalishda Osiyoning eng tezkor suzuvchisiga aylantirdi. Uning natijasi kanadalik Sammer MakIntosh tomonidan o‘rnatilgan jahon rekordidan atigi 0,40 soniyaga ortda qoldi.

Yu Zidi 2025-yilda Singapurda o‘tkazilgan Jahon chempionatida 12 yoshida Xitoyning 4x200 metrga erkin usuldagi estafeta jamoasi tarkibida bronza medalini qo‘lga kiritgandi. Shu tariqa, u Jahon chempionatlari tarixidagi eng yosh medal sohibiga aylangan.

Garchi suv sporti musobaqalarida qatnashish uchun odatda kamida 14 yosh talab qilinsa-da, Yu Zidi saralash mezonlaridagi yuqori natijalarni qayd etgani sababli jahon chempionatida ishtirok etish huquqini olgan.

Yu Zidi Osiyo o‘yinlarida yana bir shaxsiy oltin medalni 400 metrga kompleks suzish bahsida qo‘lga kiritishi mumkin. Ushbu bahs 23-sentyabr kuni o‘tkaziladi.

Ma’lumot uchun, hozirda Xitoy delegatsiyasi medallar bo‘yicha birinchi o‘rinni egallab turibdi. Ular hisobida jami 49 ta medal bor — 30 ta oltin, 12 ta kumush va 7 ta bronza.