Xitoydan Eronga Oʻzbekiston orqali konteyner poyezdi yoʻlga chiqdi
Xitoydan Eronga Oʻzbekiston orqali konteyner poyezdi yoʻlga chiqdi
Xitoy va Eron oʻrtasida Markaziy Osiyo orqali yangi tranzit yoʻnalishi ish boshladi. 55 ta konteynerdan iborat konteyner poyezdi Qozogʻiston, Oʻzbekiston va Turkmaniston orqali oʻtib, Eronga yetib boradi. Uzunligi 6 ming kilometrdan ortiq boʻlgan butun yoʻnalish taxminan ikki haftaga moʻljallangan.
Xitoydan Eron Islom Respublikasiga konteyner poyezdi tashuvini tashkil etish «Oʻztemiryoʻlkonteyner» AJ ishtirokida amalga oshirildi.
Tarkib Xitoydagi Chensyan stantsiyasida shakllantirildi. 55 ta konteynerda yengil avtomobillar uchun butlovchi qismlar, xalq isteʼmoli tovarlari va boshqa aralash yuklar mavjud.
Poyezd Qozogʻistonga Xorgos — Oltinkol chegara oʻtish joyi orqali kirib keldi. 7 sentyabr kuni u Oltinkol stantsiyasidan keyingi yoʻnalish boʻyicha joʻnatildi.
Soʻngra poyezd Keles chegara oʻtish joyi orqali oʻtib, Oʻzbekiston hududiga kiradi. Shundan soʻng tarkib mamlakat orqali tranzit tarzida harakatlanib, Xoʻjadavlat chegara stantsiyasi orqali Turkmanistonga yoʻl oladi.
Yoʻnalishning yakuniy nuqtasi Eron boʻladi. Poyezd Saraxs chegara stantsiyasi orqali oʻtishi kerak.
Yoʻnalishning umumiy uzunligi 6 ming kilometrdan oshadi. Yukni yetkazib berish 14 kundan 16 kungacha davom etishi kutilmoqda.
Bunday yoʻnalishning ishga tushirilishi «Xitoy — Markaziy Osiyo — Eron» temir yoʻl koridori asta-sekin amaliy ahamiyat kasb etayotganini koʻrsatadi. Loyiha, shuningdek, mintaqa mamlakatlari oʻrtasida muntazam konteyner tashuvlarini yoʻlga qoʻyish va Oʻzbekistonning tranzit salohiyatini yanada rivojlantirish uchun imkoniyatlar ochadi.
Bundan avval Oʻzbekiston Afgʻonistonga eksport qilishning yangi formatini ishga tushirgan edi. Endilikda yuklar yopiq temir yoʻl vagonlari tariflari boʻyicha konteynerlarda tashilmoqda, bu esa biznes uchun qoʻshimcha xarajatlarning oldini olish imkonini beradi.