«Xitoyda kapital bor, bizga esa kapital kerak» – xitoyshunos olim
Azizbek Nigmanov O‘zbekiston Xitoy bilan iqtisodiy hamkorlikdan, xususan, investitsiya va transport loyihalaridan faol foydalanishi kerakligini
«Xitoyda kapital bor, bizga esa kapital kerak» – xitoyshunos olim
Azizbek Nigmanov O‘zbekiston Xitoy bilan iqtisodiy hamkorlikdan, ayniqsa, investitsiya va transport loyihalaridan faol foydalanishi lozimligini ta’kidladi.
«Qurultoy» podkastining Xitoy iqtisodiyoti hamda Markaziy Osiyo, jumladan, O‘zbekiston bilan tarixiy aloqalariga bag‘ishlangan sonida Xalqaro Nordik universiteti dotsenti, iqtisodiyot fanlari bo‘yicha falsafa doktori (PhD) Azizbek Nigmanov ikki davlat o‘rtasidagi iqtisodiy hamkorlikning ahamiyati haqida fikr bildirdi.
Mutaxassisning aytishicha, Xitoy va Markaziy Osiyo o‘rtasidagi munosabatlar qadimdan savdo-iqtisodiy manfaatlarga tayangan. Bugungi kunda esa bu hamkorlik yangi ko‘rinishda, jumladan, investitsiyalar va yirik infratuzilma loyihalari orqali davom etmoqda.
«Unda kapital bor, bizda resurs bor. Unga resurs yetishmaydi, bizga kapital yetishmaydi. Aloqalardan foydalanish kerak, ham iqtisodiy, ham siyosiy, ham ijtimoiy», — dedi Nigmanov.
Olimning fikricha, Xitoyning mintaqadagi iqtisodiy faolligiga faqat uning manfaatlari nuqtayi nazaridan qarash to‘g‘ri emas. Har qanday yirik xalqaro loyiha ishtirokchi davlatlarga o‘z manfaatlarini ilgari surish uchun ham imkon beradi.
Suhbat chog‘ida Xitoy–Qirg‘iziston–O‘zbekiston temiryo‘li loyihasi ham muhokama qilindi. Nigmanov ushbu transport yo‘lagi O‘zbekiston uchun xalqaro savdo va logistika imkoniyatlarini kengaytirish nuqtayi nazaridan muhimligini qayd etdi.
Uning tushuntirishicha, qadimda Buyuk ipak yo‘lining asosiy yo‘nalishlari Markaziy Osiyo orqali o‘tgan bo‘lsa, zamonaviy transport tizimida ayrim yirik savdo yo‘laklari mintaqaning shimolidan o‘tmoqda. Yangi temiryo‘l O‘zbekistonning xalqaro tranzitdagi ishtirokini kuchaytirishga xizmat qilishi mumkin.
Shuningdek, loyiha Xitoyning ham manfaatlariga mos keladi. Chunki O‘zbekiston orqali Turkmaniston, Afg‘oniston va Eron yo‘nalishlariga chiqish imkoniyati mavjud.
Nigmanov Xitoy bilan iqtisodiy aloqalarni rivojlantirishda aynan mana shu o‘zaro manfaatdorlikdan foydalanish kerakligini ta’kidladi. Uning fikricha, Xitoyning resurslarga, O‘zbekistonning esa kapital va investitsiyaga bo‘lgan ehtiyoji hamkorlikni kengaytirish uchun asos bo‘la oladi.