Xitoyda bolalar bogʻchasi egasi yuzlab bolalar zaharlanganidan keyin umrbod qamoq jazosiga hukm qilindi
U va besh nafar xodimi taomlarni jozibadorroq koʻrsatish uchun ularga isteʼmolga yaroqsiz boʻyoq qoʻshgani aniqlandi.
Xitoyda yuzlab bolalar zaharlanganidan keyin bogʻcha egasi umrbod qamoq jazosiga hukm qilindi
Sud oshxona xodimlariga taomlarning koʻrinishini yaxshilash va koʻproq oʻquvchilarni jalb qilish uchun isteʼmolga yaroqsiz boʻyoqlardan foydalanish buyurilganini aniqladi.
200 dan ortiq bolani qoʻrgʻoshin bilan ifloslangan ovqat bilan zaharlashda aybdor deb topilgach, bogʻcha egasi va besh nafar xodim qamaldi.
Xitoy davlat ommaviy axborot vositalarining xabar berishicha, Gansu provintsiyasining Tyanshuy shahridagi «Xeshi Peysin» bolalar bogʻchasini boshqargan Li Xueyfan zaharli va zararli oziq-ovqat mahsulotlarini ishlab chiqarish va sotishda ayblanib, umrbod qamoq jazosiga hukm qilindi.
2025 yil iyul oyida bolalar kasallana boshlaganidan soʻng, bogʻchaning 247 nafar tarbiyalanuvchisi va xodimi qonida qoʻrgʻoshin miqdori meʼyordan ancha yuqori ekani aniqlangan edi.
Ish boʻyicha tayyorlangan hisobotda aniqlanishicha, «Xeshi Peysin» oshpazlari koʻproq oʻquvchilarni jalb qilish uchun taomlarning «koʻrinishini yaxshilash» maqsadida isteʼmolga yaroqsiz boʻyoqdan foydalanishgan, vaholanki boʻyoq qadogʻida bu haqda aniq yozib qoʻyilgan edi.
Lanchjou oraliq xalq sudi qamoq jazosi bilan bir qatorda Lining 500 000 yuan (56 200 funt sterling; 74 700 dollar) qiymatidagi shaxsiy mulkini musodara qilish haqida ham qaror chiqardi, deb xabar berdi CCTV davlat telekanali.
Bolalar bogʻchasi ijrochi direktori Chji Tszinlin 15 yilga ozodlikdan mahrum etildi va 300 000 yuan jarimaga tortildi.
Davlat OAVlariga koʻra, bogʻcha oshxonasining yana toʻrt nafar xodimi olti yildan sakkiz yilgacha boʻlgan muddatga ozodlikdan mahrum qilingan.
Sud ushbu toʻrt kishiga Li va Chji tomonidan bolalar va xodimlarga beriladigan ovqatga zaharli va zararli masalliqlar qoʻshish haqida koʻrsatma berilganini aniqladi.
Keyinchalik olingan oziq-ovqat namunalarida qoʻrgʻoshin miqdori Xitoyning milliy xavfsizlik meʼyoridan 2 000 baravar yuqori ekani maʼlum boʻldi.
Zaharlanish boʻyicha surishtiruv «Xeshi Peysin» bogʻchasining 235 nafar tarbiyalanuvchisi bugʻda pishirilgan qizil unab (xurmo)li pishiriq va sosiskali joʻxori bulochkalarini yegach, qoʻrgʻoshindan zaharlanish tufayli davolanishiga toʻgʻri kelganidan keyin boshlangan.
Tergovchilar qizil unabli pishiriq va joʻxori-sosiskali ruletlar tarkibida qoʻrgʻoshin miqdori tegishlicha 1052 mg/kg va 1340 mg/kg ni tashkil etganini aniqladilar, bu esa milliy oziq-ovqat xavfsizligi standartining 0,5 mg/kg meʼyoridan ancha yuqori.
Jahon sogʻliqni saqlash tashkiloti maʼlumotlariga koʻra, qoʻrgʻoshindan zaharlanish «ayniqsa yosh bolalar uchun juda zararli» va «miya hamda markaziy nerv tizimiga jiddiy shikast yetkazishi» mumkin.
Keyinchalik rasmiylar oʻnlab provintsiya mulozimlari va shifoxona xodimlari qon tahlillarini soxtalashtirish va bogʻcha investoridan pora olish orqali hodisani yashirishga uringanini aniqladilar.
Shundan soʻng Xitoy oʻquv muassasalarida ovqatlanishni tashkil etish boʻyicha milliy koʻrsatmalar toʻplamini chiqardi. Chora-tadbirlar orasida har bir yangi oziq-ovqat turkumini tekshirish hamda un, guruch va oʻsimlik yogʻini faqat markazlashtirilgan xarid punktlaridan sotib olish talabi bor.