Xitoyda atom energiyasini uzatuvchi ulkan elektr tarmogʻi ishga tushdi
Xitoyda Yantay - Veyxay oʻta yuqori kuchlanishli oʻzgaruvchan tok elektr uzatish liniyasi toʻliq foydalanishga topshirildi. Mamlakat Davlat elektr tarmoqlari korporatsiyasiga koʻra, bu atom elektr stansiyalarida ishlab chiqarilgan energiya ulangan dunyodagi birinchi shunday tarmoqdir.
Xitoyda atom energiyasini uzatuvchi yirik elektr tarmogʻi ishga tushirildi
Naked Science xabariga koʻra, yangi liniya Shandun provinsiyasining Yantay va Veyxay hududlarida ishlab chiqariladigan elektr energiyasini boshqa hududlarga yetkazish uchun moʻljallangan.
Liniyaning bir zanjir bo‘yicha ekvivalent uzunligi 1197 kilometrni tashkil etadi. U Yantay, Sindao, Jichjao, Veyfan va Lini shaharlari hududlaridan oʻtadi.
Loyiha doirasida 1000 kilovolt, yaʼni bir million volt kuchlanishli yangi taqsimlash podstansiyasi qurildi va shu toifadagi ikkita mavjud podstansiya kengaytirildi.
Shuningdek, 2124 ta elektr uzatish tayanchi oʻrnatildi. Ularning 822 tasi tepalik va togʻli hududlarda, yana 17 tasi esa dengiz akvatoriyasida joylashgan.
Shandun Xitoyning eng koʻp energiya isteʼmol qiluvchi provinsiyalaridan biri hisoblanadi. 2026-yil sentabr oyi yakuniga kelib, bu yerda qazilma yoqilgʻilardan foydalanmaydigan energetika obyektlarining oʻrnatilgan quvvati 147 million kilovattga yetgan. Shamol va quyosh energetikasi hissasiga 132 million kilovatt — provinsiya elektr stansiyalari umumiy oʻrnatilgan quvvatining yarmidan koʻpi toʻgʻri kelgan.
Yantay — Veyxay yarimorolida Shandun atom energetikasining katta qismi jamlangan. Hudud elektr energiyasini asosan tashqaridan qabul qiluvchi mintaqadan uni boshqa joylarga yetkazib beruvchi yirik markazga aylanib bormoqda.
Yangi liniya mavjud tarmoqqa ulanib, «sakkiz» raqamiga oʻxshash ikkita halqadan iborat tizimni hosil qildi. Bu Xitoydagi shunday tuzilishga ega birinchi mintaqaviy oʻta yuqori kuchlanishli tarmoq hisoblanadi.
Halqalar bir-biri uchun zaxira vazifasini bajarishi mumkin. Bu elektr uzatish imkoniyatini kengaytirib, tizimda nosozliklar yuz berganda tarmoq barqarorligini oshiradi.
Loyiha Xitoyda bir vaqtning oʻzida togʻli hudud va dengiz akvatoriyasi orqali qurilgan birinchi oʻta yuqori kuchlanishli liniya ekani bilan ham ajralib turadi. Faol qurilish davri 12 oyni tashkil etgan — bu mamlakatdagi shu toifa va oʻxshash koʻlamdagi oʻzgaruvchan tok uzatish loyihalari uchun eng qisqa muddat sifatida qayd etilgan.
Xayyan-Si taqsimlash podstansiyasi esa «bir maydonda ikkita stansiya» tamoyili asosida qurilgan. Kelgusida undan 1000 kilovolt kuchlanishli 12 ta chiquvchi liniya tashkil etish rejalashtirilgan.