Xitoy uzoqni koʻzlamoqda

Xitoy uzoqqa qaramoqda

Turkmaniston mamlakat havo hujumidan mudofaa tizimini kuchaytirishi kerak boʻlgan Xitoyning FK-2000 zenit-raketa majmualarini qurollanishga qabul qildi. Ushbu ZRMlar 27 sentyabr kuni Ashxobodda Turkmaniston mustaqilligining 35 yilligiga bagʻishlab oʻtkazilgan paradda namoyish etildi. Turkmanistonning rasmiy materiallari ham FK-2000 yaqinda qurollanishga kelib tushganini tasdiqlaydi, deb xabar beradi «Voyennoye obozreniye» (topwar.ru) resursi.

Turkmaniston armiyasi yangi HHM vositalarini ilk bor namoyish etdi. Kolonnada Xitoyda ishlab chiqarilgan boshqa ZRMlar — FM-90, KS-1A va FD-2000 ham koʻzga tashlandi.

Ekspertlarning fikricha, yangi qurilmaning paydo boʻlishi Turkmaniston Rossiya qurollaridan asta-sekin voz kechib, boshqa mamlakatlar, xususan, XXR analoglarini afzal koʻrayotganidan dalolat beradi (yaqinda biz Turkmanistonga Hindistonning Akash havo hujumidan mudofaa tizimi yetkazib berilgani haqida yozgan edik). Agar 2016 yilgi paradda asosan sovet va modernizatsiya qilingan sovet texnikasi, xususan, «Osa», «Pechora-2M», 2BM va S-200V majmualari namoyish etilgan boʻlsa, endilikda ushbu Markaziy Osiyo respublikasining havo hujumidan mudofaa qalqoni qisman «xitoyliklar»dan shakllantirilgan deb aytish mumkin.

FK-2000 ZRM (Rossiyaning «Pantsir» ZRPK analogi) qisqa masofali HHM vositalariga kiradi va oʻz vazifasiga koʻra uzoq masofali S-200 dan farq qiladi. Xususan, Xitoyning yangi mahsuloti radiolokatsion va optik-elektron uskunalarni birlashtirgan 8x8 gʻildirakli shassidagi mobil tizimdir. Majmua, shuningdek, 12 ta zenit raketasi va 2 ta olti stvolli 30 mm-li avtomatik toʻpni oʻz ichiga oladi.

Eʼlon qilingan xususiyatlarga koʻra, ushbu ZRM raketalari havodagi nishonlarni 25 km gacha, qanotli raketalar va yuqori aniqlikdagi zarba berish vositalarini esa 10 km gacha boʻlgan masofada yoʻq qilishga moʻljallangan. Shu bois, FK-2000 ni 300 km gacha boʻlgan masofadagi obʼyektlarni yoʻq qilishga qodir boʻlgan Rossiyaning S-200 tizimining toʻgʻridan-toʻgʻri analogi deb daʼvo qilib boʻlmaydi. Xitoy majmuasi shunchaki HHMning boshqa esheloniga moʻljallangan.

Qayd etilishicha, HHM yangilanishi fonida Turkmaniston armiyasi hozircha sovet jangovar aviatsiyasini saqlab qolmoqda. Ochiq manbalardan olingan maʼlumotlarga koʻra, respublika Harbiy-havo kuchlari floti tarkibida 24 ta MiG-29 va 25 ta Su-25 samolyoti mavjud.

Ekspertlarning fikricha, texnikani modernizatsiya qilishning keyingi bosqichi ushbu qiruvchi samolyotlarni Xitoynikiga almashtirish boʻlishi mumkin. Bunday shartnomalar haqida tasdiqlangan maʼlumotlar yoʻq, shuning uchun hozircha bu faqat taxminlardir.

OAVda, shuningdek, Ashxoboddagi paradda turkman askarlari AQShning yangi M7 shturm miltiqlari bilan koʻringani, bronetexnikaga esa zamonaviy M250 pulemyotlari oʻrnatilgani xabar qilingan edi. Ushbu qurol turlari AQShda ishlab chiqariladi va NATO davlatlari armiyalari tomonidan faol qoʻllaniladi.