Xitoy kompaniyalari Oʻzbekistonda farmatsevtika loyihalarini rivojlantirishdan manfaatdor
Oʻzbekiston va Xitoy farmatsevtika sohasidagi qoʻshma loyihalarni, investitsiyalarni jalb qilish, ishlab chiqarishni mahalliylashtirish va texnologiyalar transferini muhokama qildi.
Xitoy kompaniyalari Oʻzbekistonda farmatsevtika loyihalarini rivojlantirishga qiziqish bildirmoqda
Tibbiyot va farmatsevtika tarmogʻini rivojlantirish agentligi direktori Abdulla Azizov Chjan Syun boshchiligidagi Xitoy kompaniyalari vakillari bilan uchrashuv oʻtkazdi. Unda Oʻzbekiston va Xitoy oʻrtasida farmatsevtika va tibbiyot sohalaridagi hamkorlikni kengaytirish istiqbollari muhokama qilindi.
Tomonlar qoʻshma loyihalar, investitsiyalarni jalb qilish masalalari va oʻzaro manfaatli hamkorlikning yangi yoʻnalishlarini koʻrib chiqdilar.
Uchrashuv davomida Oʻzbekistonda xorijiy investitsiyalarni jalb qilish, farmatsevtika tarmogʻida yangi ishlab chiqarish quvvatlarini rivojlantirish va ishlab chiqarilayotgan mahsulotlarni mahalliylashtirish uchun sharoitlar yaratilayotgani taʼkidlandi.
Zamonaviy texnologiyalarni joriy etish va farmatsevtika ishlab chiqarishining eksport salohiyatini oshirish imkoniyatlariga alohida eʼtibor qaratildi.
Tomonlar vakillari, shuningdek, investitsiyalar, ishlab chiqarish va texnologiyalar transferi sohasida hamkorlikni kengaytirish boʻyicha fikr almashdilar. Muhokama qilingan yoʻnalishlar qatorida mahsulotlarni mahalliylashtirish va korxonalarning xalqaro bozorlarga chiqishi ham bor edi.
Uchrashuv yakunlari boʻyicha aniq loyihalar asosida istiqbolli tashabbuslarni amalga oshirish toʻgʻrisida kelishuvga erishildi.
Tomonlar, shuningdek, Oʻzbekiston va Xitoy kompaniyalari oʻrtasida tibbiyot va farmatsevtika tarmoqlarida amaliy hamkorlikni davom ettirishga kelishib oldilar.