Xitoy iqtisodiyotni ragʻbatlantirish uchun davlat banklari va sugʻurta kompaniyalariga 54 milliard dollar kiritadi
Bu Pekin bir qator muammolar fonida oʻz iqtisodiyotini qayta shakllantirishni maqsad qilgan bir paytga toʻgʻri kelmoqda.
Xitoy iqtisodiyotni qoʻllab-quvvatlash uchun davlat banklari va sugʻurta kompaniyalariga 54 milliard dollar kiritishni rejalashtirmoqda
Xitoy mamlakat moliyaviy tizimini mustahkamlash va sekinlashayotgan iqtisodiyotini qoʻllab-quvvatlash maqsadida sakkizta davlat banki va sugʻurta kompaniyasiga oʻnlab milliard dollar yoʻnaltirmoqda.
Xitoy Moliya vazirligi boshchiligidagi kapitalni koʻpaytirish hajmi 360 milliard yuanni (53,6 milliard dollar; 39,7 milliard funt sterling) tashkil etadi, deb xabar berdi yakshanba kuni «Sinxua» davlat axborot agentligi.
Agentlikning taʼkidlashicha, ushbu qadam «ularning sogʻlom faoliyat yuritish imkoniyatlarini, xavf-xatarlarga chidamliligini va real iqtisodiyotga xizmat koʻrsatish qobiliyatini yanada oshirishga yordam beradi».
Bu Pekinning Gʻarb bilan savdo keskinligi, Eron urushining taʼsiri va aholining qarishi kabi muammolar bilan kurashayotgan dunyoning ikkinchi yirik iqtisodiyotini jonlantirish borasidagi soʻnggi saʼy-harakatlaridan biridir.
Ushbu paket uchta yirik kreditor va beshta sugʻurta kompaniyasi, jumladan, Xitoy Sanoat va savdo banki (Industrial and Commercial Bank of China), Xitoy Qishloq xoʻjaligi banki (Agricultural Bank of China) va Xitoy Eksport va kredit sugʻurtasi korporatsiyasi (China Export & Credit Insurance Corporation) молиявий ҳолатини яхшилайди.
Davlat OAVsi hisoblangan «Global Times» nashrining yozishicha, bu «global moliyaviy noaniqlik davrida banklar va moliyaviy institutlarga tashqi zarbalarga bardosh berish qobiliyatini mustahkamlash bilan bir qatorda, real iqtisodiyotni kreditlashga yoʻnaltirish uchun koʻproq resurslar beradi».
Prezident Si Tszinpin azaldan moliyaviy barqarorlikni Xitoy milliy xavfsizligining markaziy omili deb hisoblab keladi.
Ushbu dam olish kunlaridagi eʼlonlar Pekin ishchi kuchining qisqarishi hamda AQSh bilan davom etayotgan savdo va texnologiya raqobati kabi bir qator muammolar fonida iqtisodiyotni qayta shakllantirishga intilayotgan bir paytda yangradi.
Xitoyning iqtisodiy oʻsishi aprel oyi boshidan iyun oyi oxirigacha keskin sekinlashdi, chunki ichki talabning zaifligi va Eron urushining neft narxiga taʼsiri mamlakatning kuchli eksportidan ustun keldi.
Iyul oyida eʼlon qilingan rasmiy yalpi ichki mahsulot (YAIM) maʼlumotlari shuni koʻrsatdiki, ikkinchi chorakda iqtisodiyot 4,3 foizga oʻsgan, bu Pekinning yillik maqsadidan past va birinchi chorakdagi 5 foizlik oʻsishdan kamdir.
Mart oyida Pekin oʻsish maqsadini 4,5%-5% oraligʻigacha pasaytirdi, bu 1991 yildan beri eng zaif iqtisodiy oʻsish maqsadi boʻldi. Baʼzi tahlilchilarning fikricha, bu qadam Pekinga mavjud iqtisodiy zaiflikni tan olish uchun imkoniyat berdi.