Xiaomi yangi Skynomad gibrid avtomobil sotuvini yoʻlga qoʻydi

Xiaomi Xitoyda gibrid model — yetti oʻrinli Skynomad N90 Max savdosini boshladi, deb xabar berdi CarNewsChina.

Model ketma-ket gibrid (EREV) turiga kiradi: benzinli dvigatel faqat generator sifatida ishlaydi, harakat esa elektromotorlar orqali taʼminlanadi.

N90 Max — katta 7 oʻrinli krossover bo‘lib, uning uzunligi 5285 mm, gʻildirak bazasi esa 3080 mm. Aerodinamik qarshilik koeffitsiyenti 0,255 ga teng bo‘lib, bu katta krossover uchun past ko‘rsatkich hisoblanadi. Old qismida xochsimon bezak va 624 metr masofani yoritadigan «Ninachi» faralari joylashtirilgan.

Kapotda chuqurligi 750 mm gacha bo‘lgan suv to‘siqlaridan o‘tishga imkon beruvchi havo yigʻgich bor, hatto avtomobilning suvda muallaq tura olishi ham aytilgan.

Salon uchun uch xil bezak varianti taklif etiladi: keramik-qaymoq, qora va mokko-jigarrang. Oʻrindiqlar joylashuvi 2+2+3 ko‘rinishida, transformatsiyaning 11 ta varianti va 1831 litr yukxona hajmi mavjud.

Oldingi va ikkinchi qatordagi oʻrindiqlar vaznsizlik holati, massaj, ventilyatsiya va isitish rejimlariga ega. Markaziy orolcha harakatlanuvchan bo‘lib, yoʻnaltirgichlarga o‘rnatilgan va uning ichiga 9 litrli muzlatkich joylashtirilgan. Multimedia tizimi HyperOS boshqaruvidagi Qualcomm 8650 chipiga asoslangan 16,1 dyuymli ekrandan iborat.

Dvigatel tarkibiga 1,5 litrli turbomotor-generator va ikkita elektromotor kiradi — ularning umumiy quvvati 421 ot kuchini tashkil etadi. Faqat elektr quvvatida yurish masofasi 464 km (CLTC), umumiy yurish masofasi esa 1705 km.

Xavfsizlik jihatidan krossover 12 ta xavfsizlik yostiqchasi, Nvidia Thor (700 TOPS) chipi va Xiaomi HAD XLA kognitiv modelidagi avtopilot bilan jihozlangan. Bundan tashqari, katta yoʻl va shahar ichida harakatlanish uchun navigatsiya yordamchisi hamda avtomatik parkovka funksiyalari qoʻllab-quvvatlanadi.