Volgogradda dronlar hujumi: koʻp qavatli uy yondi
Rossiyaning Volgograd shahrida 2-oktabrga oʻtar kechasi dronlar hujumi oqibatida koʻp kvartirali uyda yongʻin chiqdi. Mahalliy rasmiylarga koʻra, bir kishi shifoxonaga yotqizilgan. Shuningdek, Volgograddagi sanoat korxonalari va Samaradagi yirik neft stansiyasiga hujum qilingani haqida xabarlar tarqaldi.
Volgogradda dronlar hujumi: koʻp qavatli uy yondi
DW xabar berishicha, Volgograd viloyati maʼmuriyati Telegram orqali shaharning Krasnoarmeyskiy tumanidagi Udmurtskaya koʻchasida joylashgan koʻp kvartirali uyda yongʻin chiqqanini maʼlum qilgan.
Viloyat gubernatori Andrey Bocharov hujumni Ukraina dronlari amalga oshirganini bildirgan. Uning aytishicha, bir kishi jarohat olgan va shifoxonaga olib ketilgan.
Xabar eʼlon qilingan vaqtda yongʻinning tarqalishi toʻxtatilgan, tezkor xizmatlar esa voqea joyida ishni davom ettirayotgan boʻlgan.
Bocharov bayonotida hujum viloyatning «sanoat infratuzilmasi»ga qaratilgani aytilgan. Ammo qaysi korxonalar zarar koʻrgani ochiqlanmagan.
Astra Telegram kanali guvohlar tasvirlariga tayangan ochiq manbalar tahlilida yongʻin shuʼlasi Volgograd neftni qayta ishlash zavodi va uning yaqinidagi «Kaustik» korxonasi tomonida koʻringanini bildirgan.
Shu bilan birga, kanal mualliflari mavjud videolar orqali aynan nima yonayotganini aniqlashning imkoni yoʻqligini qayd etgan. Shu sababli mazkur korxonalardagi ehtimoliy yongʻinlar haqidagi maʼlumotlar hozircha aniq tasdiqlanmagan.
Volgograd neftni qayta ishlash zavodi «Lukoyl» tarkibiga kiradi. Yiliga qariyb 14 mln tonna neftni qayta ishlash quvvatiga ega bu korxona Rossiya janubidagi eng yirik neft zavodlaridan biri sanaladi.
Astra maʼlumotiga koʻra, «Kaustik» ham Volgograd viloyatining yetakchi korxonalaridan biri boʻlib, fuqarolik va harbiy maqsadlarda ishlatilishi mumkin boʻlgan asosiy kimyoviy mahsulotlarni ishlab chiqaradi. Kanal bu mahsulotlarning Rossiya harbiy-sanoat majmuasi uchun muhimligini taʼkidlagan.
2-oktabr tongida Astra oʻz tahliliga tayangan holda Rossiyadagi yana bir energetika obyekti — «Samara» neft uzatish va dispetcherlik stansiyasiga ham hujum qilingan boʻlishi mumkinligini xabar qilgan.
EnergyBase portali maʼlumotiga koʻra, «Transneft - Privolga» kompaniyasiga qarashli ushbu stansiya Rossiyadagi shu turdagi eng yirik obyekt boʻlib, neftni tashish va aralashtirishda muhim rol oʻynaydi.