UzPost pochta operatori Rossiyaning Wildberries tuzilmasiga ishonchli boshqaruvga berildi
UzPost’ning davlat aktsiyalar paketi 2025 yil 30 dekabrdagi shartnomaga asosan Rossiyaning Wildberries sho‘ba korxonasiga ishonchli boshqaruvga berildi. Avvalroq DAVO rahbari bunday shartnoma mavjud emasligini bildirgandi. O‘tgan yilning noyabr oyidayoq WB INT EXPORT ishonchli boshqaruvchi litsenziyasini olgan edi.
UzPost pochta operatori Rossiyaning Wildberries tuzilmasiga ishonchli boshqaruvga berildi
«Oʻzbekiston pochtasi» (UzPost) milliy pochta aloqasi operatorining davlat aktsiyalar paketi Rossiyaning Wildberries marketpleysiga qarashli OOO «WB INT EXPORT» shoʻʼba korxonasiga ishonchli boshqaruvga berildi. Bu haqda aktsiyadorlarning 21 sentyabrdagi yigʻilishi bayonnomasida aytiladi.
Koʻchirmada ishonchli boshqaruv shartnomasiga va uning asosida amalga oshirilgan harakatlarga bir nechta havolalar mavjud.
Xususan, №01/3−94-sonli shartnomaning 6.1-bandiga havola qilingan holda, 2026 yil 31 martda OOO «WB INT EXPORT» №DDU-4-sonli xat yuborib, unda pochta operatorining kuzatuv kengashiga oʻz nomzodlaridan besh kishini saylashni taklif qilgani koʻrsatilgan.
Bundan tashqari, hujjatda «Aktsiyadorlik jamiyatlari va aktsiyadorlarning huquqlarini himoya qilish toʻgʻrisida»gi qonunning 65-moddasiga havola qilingan holda, WB INT EXPORT UzPost davlat aktsiyalar paketining ishonchli boshqaruvchisi hisoblanishi hamda qonunchilikka va 2025 yil 30 dekabrdagi shartnomaga muvofiq aktsiyadorning barcha huquqlariga ega ekani aytiladi.
Ushbu asosda kompaniya 11 avgust kuni №DDU-8-sonli xat yuborib, aktsiyadorlarning navbatdan tashqari yigʻilishini chaqirishni va kun tartibiga kuzatuv kengashining yangi tarkibini saylash toʻgʻrisidagi masalani kiritishni talab qilgan.
21 sentyabrdagi yigʻilish yakunlariga koʻra, aktsiyadorlar uch yil muddatga toʻqqiz kishidan iborat kuzatuv kengashini sayladilar. Koʻpchilik oʻrinni — beshta oʻrinni — Wildberries & Russ bilan bogʻliq vakillar egalladi:
Qolgan toʻrtta oʻrinni davlat tuzilmalari vakillari va kengashning mustaqil aʼzosi egalladi.
Eʼtiborlisi, shartnoma tuzilishidan bir oy oldin, 2025 yil 26 noyabrda Istiqbolli loyihalar milliy agentligi (ILMA) OOO «WB INT EXPORT»ga investitsiya aktivlarini ishonchli boshqaruvchi sifatida qimmatli qogʻozlar bozorida professional faoliyatni amalga oshirish uchun litsenziya berilganini maʼlum qilgan edi.
Idora, shuningdek, kompaniya toʻgʻrisidagi maʼlumotlar qimmatli qogʻozlar bozori professional ishtirokchilarining elektron reyestriga kiritilgani haqida xabar bergan.
Spot manbasining xabar qilishicha, UzPost’ning davlat aktsiyalar paketi Wildberries’ning yuz foizlik shoʻʼba tuzilmasi boʻlgan WB INT EXPORT’ga bir yil muddatga ishonchli boshqaruvga berilgan. Bunga Vazirlar Mahkamasining 2025 yil 13 oktyabrdagi qarori va 30 dekabrdagi shartnoma asos boʻlgan.
Korporativ hujjatlardagi maʼlumotlar Davlat aktivlarini boshqarish agentligi direktori Sohibjon Murodovning ommaviy bayonotlariga zid keladi.
8 oktyabrdagi matbuot anjumanida u UzPost Wildberries’ning ishonchli boshqaruvida emasligini aytgan edi. Kun.uz jurnalistining kompaniya yopiq hujjat asosida berilgani haqidagi toʻgʻridan-toʻgʻri savoliga javob berar ekan, agentlik rahbari shunday dedi:
«Bugungi kunda ishonchli boshqaruv shartnomasi yoʻq. Faqat hamkorlik shartnomasi mavjud. Buni toʻgʻridan-toʻgʻri ishonchli boshqaruv deb atab boʻlmaydi».
Shu bilan birga, Murodov ilgari pochta operatorini boshqarishga kompaniyani jalb qilish toʻgʻrisida kelishuv mavjud boʻlganini tan oldi.
Wildberries’ning besh nafar vakili kuzatuv kengashiga kirganini u marketpleys tajribasidan foydalanish va pochta infratuzilmasini rivojlantirish uchun moliyalashtirishni jalb qilish niyati bilan tushuntirdi.
U, shuningdek, Wildberries’dan 360 mlrd soʻmlik foizsiz moliyalashtirishni jalb qilish boʻyicha dastlabki muzokaralar olib borilayotganini maʼlum qildi. Ilgari taklif qilingan yiliga 14% stavkadagi 100 mlrd soʻmlik zayom aktsiyadorlar tomonidan maʼqullanmagan edi.
Shu bilan birga, 21 sentyabrdagi yigʻilish bayonnomasidan olingan koʻchirma WB INT EXPORT’ga aktsiyador huquqlarini bergan ishonchli boshqaruv shartnomasi mavjudligiga toʻgʻridan-toʻgʻri ishora qiladi.
№01/3−94-sonli shartnomaning toʻliq matni, jumladan ishonchli boshqaruv shartlari, mukofot miqdori, tomonlarning majburiyatlari va shartnomani bekor qilish tartibi oshkor etilmayapti.
3 oktyabr kuni DABA UzPost xususiylashtirilishi haqidagi xabarlarni rasman rad etdi. Idora 92,9% miqdoridagi davlat ulushi agentlikda konsolidatsiya qilinganini, Wildberries va Uzum Market esa uni sotib olishga qiziqish bildirganini maʼlum qildi.
Shu bilan birga, DABA maʼlumotlariga koʻra, davlat ulushini xususiylashtirish boʻyicha hujjatlar rasmiylashtirilmagan.