Uzbekistan Airports ва My Freighter e-commerce учун йўналиш йўлга қўйди
Uzbekistan Airports va My Freighter Xitoydan Yevropaga e-commerce yuklarini yetkazib berish uchun Toshkent orqali multimodal yoʻnalishni yoʻlga qoʻydi.
Uzbekistan Airports ва My Freighter e-commerce учун йўналиш йўлга қўйди
Uzbekistan Airports My Freighter yuk aviakompaniyasi bilan birgalikda Xitoydan Yevropa mamlakatlariga elektron tijorat yuklarini «Toshkent» xalqaro aeroporti orqali yetkazib berish boʻyicha multimodal loyihani boshladi.
Yangi yoʻnalish avtomobil va havo tashuvlarini yagona logistika zanjiriga birlashtiruvchi Truck-to-Air sxemasi boʻyicha ishlaydi. Xitoyning turli shaharlaridan yuklar avval avtotransportda Toshkentga olib kelinadi va bu yerda zarur ishlov berish jarayonlaridan oʻtadi. Soʻngra ular havo transporti orqali Belgiyadagi Lyej xalqaro aeroportiga joʻnatiladi.
Loyiha 2026 yil 22 avgustda ishga tushirildi. Hozirgi vaqtda uning doirasida yettita yuk reysi amalga oshirildi.
Keyingi bosqichda tashuvlar chastotasini haftasiga toʻrt-oltita reysgacha oshirish rejalashtirilgan. Bunda har bir havo kemasining yuklanishi taxminan 50 tonnani tashkil etadi. Agar rejalashtirilgan chastotaga chiqilsa, tashuvlar hajmi haftasiga 200–300 tonna elektron tijorat yuklarini tashkil etishi mumkin.
Uzbekistan Airports yuk tashish faoliyati boʻlimi boshligʻi Kamoliddin Buxorov ushbu loyiha Toshkentning Osiyo va Yevropa oʻrtasidagi multimodal xab sifatidagi tranzit salohiyatini ishga solish imkonini berishini taʼkidladi.
«Aviatsiya va yer usti tashuvlarini birlashtirgan holda, biz Xitoyning eng yirik elektron tijorat markazlarini Yevropa bozorlari bilan bogʻlaydigan samarali logistika yoʻnalishini yaratmoqdamiz», — dedi u.
Uning soʻzlariga koʻra, loyihaning amalga oshirilishi Oʻzbekistonning tranzit salohiyatini yanada rivojlantirishga va Toshkentning xalqaro logistikadagi mavqeini mustahkamlashga xizmat qiladi.