Uyida yashab oʻqiydigan universitet talabasi uydan ketishga «tayyor emas edi»
Oʻqishni boshlayotgan talabalarning uchdan bir qismi uyda yashamoqda, deydi Glostershir universiteti.
Uyida yashab oʻqiydigan talaba uydan ketishga «tayyor emasdi»
Ofeliya Baynsning aytishicha, uning koʻplab doʻstlari ham uyida yashamoqda
Universitetning maʼlum qilishicha, bu yil oʻqishni boshlayotgan talabalarning uchdan bir qismi «moliyaviy jihatdan yaxshiroq ahvolda» boʻlish uchun uyida yashamoqda yoki maʼruzalarga qatnab oʻqimoqda.
Glostershir universiteti (The University of Gloucestershire) talabalar uchun moslashuvchan turar joylar, chegirmali transport chiptalari va aynan qatnab oʻqiydiganlar uchun qurilgan yangi qulayliklarni taklif qilish orqali ularni qoʻllab-quvvatlashni kuchaytirganini bildirdi.
Glosterda ulgʻaygan kommunikatsiya va media yoʻnalishi talabasi Ofeliya Bayns bir kun kelib shahardan ketishga umid qilsa-da, hozircha bunga «tayyor emasligini» aytdi.
«Yotoqxonada yashaydigan koʻplab odamlarga qaraganda moliyaviy jihatdan yaxshiroq ahvolda ekanimni bilaman», dedi u va «juda koʻp odamlar» xuddi shunday yoʻl tutayotganini qoʻshimcha qildi.
«Men bilan birga maktabda oʻqiganlarning aksariyati shu hududda qolib, universitetga kirdi.
Men uchun juda yaqin joyda yashab turib, turar joy uchun pul toʻlashning hech qanday mantigʻi yoʻq edi, ustiga-ustak, doʻstlarim bilan koʻrishib turibman va universitet hayotini ham his qilyapman — bu har tomonlama qulay», deya qoʻshimcha qildi u.
«Shuningdek, kuchugimni ham tashlab ketolmasdim, oilamga yaqin boʻlish esa men uchun juda muhim».
Sud psixologiyasi yoʻnalishida ikkinchi kursda oʻqishni boshlagan Teylor Barker universitetning Glosterdagi Siti kampusidagi maʼruzalarga borish uchun 40 daqiqalik yoʻl bosib oʻtadi.
Uning aytishicha, uydan turib oʻqish «qoʻshimcha qulaylik» boʻlib, moliyaviy jihatdan «qatnab oʻqish foydaliroq».
«Oilam men uchun juda muhim, uydan koʻchib ketib, bu aloqani yoʻqotishni xohlamayman», dedi u.
«Koʻchib ketish haqidagi fikrning oʻzi ancha qoʻrqinchli edi».
Uning aytishicha, u «biroz uzoqroqda joylashgan bir nechta universitetlarni borib koʻrgan, lekin ular unga yoqmagan».
«Bu mening mustaqil boʻlishimga xalaqit bermadi. Maʼruzalarda odamlar bilan tanishasiz, koʻpincha oʻzingizga oʻxshagan, xuddi shunday masofadan qatnaydigan yoki aslida sizga juda yaqin yashaydigan odamlarni topasiz.
Bu shunchaki odamlar bilan tanishishning boshqacha usuli».
Universitetning talabalar bilan ishlash boʻyicha direktori Styuart Dav odamlarning yashash xarajatlari sababli shunday tanlov qilishga majbur boʻlayotgani «achinarli» ekanini, biroq qatnab oʻqish «universitet xarajatlarini tejashga» yordam berishi va talabalarga «yarim stavkali ishda ishlashni davom ettirish yoki oilasi va doʻstlariga yaqin boʻlish» imkonini berishini aytdi.
U qoʻshimcha qildi: «Pittvill [kampusi]dagi moslashuvchan turar joylarimiz talabalarning har kuni uydan koʻchib ketish yoki qatnash oʻrtasida tanlov qilishlari shart emasligini anglatadi, ular uyda yashab, haftasiga uch kechagacha kampus yaqinida qolish imkoniyatiga ega.
Ushbu imkoniyatlar qatnab oʻqiydigan talabalarga universitet taklif qiladigan barcha narsalardan osonlikcha foydalanishda yordam beradi deb umid qilamiz».