Uyda ish haqida o‘ylamaslik uchun nima qilish kerak?
Uyda ish haqida o‘ylashni to‘xtatish uchun nima qilish kerak?
Ko‘pchilik ishdan tashqari vaqtda ham ish haqida o‘ylaydi, bu ba’zan yangi g‘oyalarga olib kelishi mumkin. Biroq, ish haqida haddan tashqari ko‘p o‘ylash stressni keltirib chiqaradi, bu esa tunda uyqusizlikka yoki budilnik chalinishidan bir necha soat oldin tashvishlanishga sabab bo‘ladi.
Korn Ferry kompaniyasining 2018-yilgi tadqiqotiga ko‘ra, stress amerikalik ishchilarning 66 foizida uyqusizlikni keltirib chiqargan. Uyqusizlik esa tanqidiy fikrlash, muammolarni hal qilish, rejalashtirish va tashkil etish kabi kognitiv funksiyalarga salbiy ta’sir ko‘rsatib, stressni yanada kuchaytirishi mumkin.
Yarim tunda ish haqida o‘ylamaslik uchun quyidagi strategiyalarni sinab ko‘ring:
**Vazifalar ro‘yxatini tuzing**
Har doim bajarilishi kerak bo‘lgan ishlar ko‘p. Baylor va Emori universitetlari tomonidan o‘tkazilgan tadqiqotlar shuni ko‘rsatdiki, uyquga yotishdan oldin ertangi kun uchun vazifalar ro‘yxatini tuzish tezroq uxlashga yordam beradi. Bu usul tunda kamroq uyg‘onishga yordam beradi, chunki tugallanmagan vazifalarni yozish kognitiv qo‘zg‘alish, fikrlash va tashvishni kamaytiradi. Agar yarim tunda uyg‘onib, muhim vazifa yodingizga tushsa, uni yozib olish uchun ish stolingizga qog‘oz va qalam qo‘yishni odat qiling. Uni yozib, xayolingizdan chiqarib tashlang va yana uxlashga harakat qiling.
**Kundalik yoki yon daftar tuting**
Fikrlaringiz va his-tuyg‘ularingizni yon daftarga yozish ularni miyada aylantirishdan ko‘ra hissiyotlarni jilovlashga yordam beradi, shu bilan birga stress va tashvishlarni kamaytiradi. Shuningdek, ijobiy voqealar va minnatdorchilik hissini keltirib chiqaradigan narsalarni yozish uzoqroq va tetiklantiruvchi uyquga yordam beradi.
Next Step Partners kompaniyasi asoschisi Rebekka Sukerning so‘zlariga ko‘ra, uyquga yotishdan oldin xavotirli holatlardan aziyat chekkan kollej talabalari o‘rtasida o‘tkazilgan tadqiqotda, bir hafta davomida har kuni kechasi kundalikka yozgan talabalar guruhi uyqu vaqti va sifatini yaxshilashdan tashqari, uxlash vaqtidagi stress va xavotirlanishning kamayishini boshdan kechirgan.
**O‘zingizga nisbatan mehribon bo‘ling**
Kristenn Neff o‘zining "O‘zingizni xursand qilish — o‘zingiz haqida qayg‘urishning isbotlangan usuli" kitobida insonning o‘zi uchun qayg‘urishini yaxshi do‘st kabi o‘ziga mehribonlik va g‘amxo‘rlik qilish deb ta’riflaydi. O‘ziga nisbatan mehribon bo‘lishni o‘rganish, hammamiz nomukammal ekanimizni tan olish, uyqusizlik bilan bog‘liq bo‘lgan salbiy fikrlar va mish-mishlar bilan birga keladigan o‘z-o‘zini baholash siklini buzishga imkon beradi.
**Jismoniy mashqlar bilan shug‘ullaning**
Tadqiqotlar shuni ko‘rsatadiki, bir martalik intensiv mashg‘ulotlar insonning tunda sergak bo‘lishini kamaytirishi mumkin. Umuman olganda, 30 daqiqalik aerobik mashqlar tezroq uxlashga yordam berishi va uyqu sifatini yaxshilashi haqida isbotlangan dalillar mavjud. Ba’zilar uchun uyquga yotishdan oldin mashq qilish uyquga xalaqit berishi mumkin. Agar siz shu turga kiruvchi insonlardan bo‘lsangiz, uyquga yotishdan kamida bir-ikki soat oldin mashq qilish tavsiya etiladi.
**Meditatsiya bilan shug‘ullaning**
Meditatsiyaning tashvish va stressga ijobiy ta’siri haqida ko‘plab tadqiqotlar mavjud. Bundan tashqari, Gollandiyadagi tadqiqotchilar hatto kichik hajmdagi aqliy meditatsiya (ikki hafta davomida ishdan 10 daqiqa oldin va keyin) ongni tinchlantirishga, uyqu sifatini va uyqu davomiyligini yaxshilashga yordam berishini aniqladi.
Ishda stressli holatlar bo‘lishi aniq, biroq bu tungi yaxshi uyquga xalaqit berishi kerak emas. Yuqoridagi strategiyalarni qo‘llash orqali ish kunini tetik, muvaffaqiyatli o‘tkazishga tayyor holda uyg‘onish qobiliyatingizni oshirishingiz mumkin.