US Open. Jokovich va Sabalenka juftligi ilk bosqichdayoq mag‘lub bo‘ldi

US Open. Jokovich va Sabalenka juftligi ilk bosqichdayoq mag‘lubiyatga uchradi

Nyu-York shahrida start olgan "Katta dubulg‘a" turkumiga kiruvchi US Open turnirining aralash juftlik bahslarida asosiy favoritlardan biri sanalgan Arina Sabalenka va Novak Jokovich tandemi kutilmagan mag‘lubiyat bilan musobaqani tark etdi.

Dunyoning birinchi raqamli tennischisi Arina Sabalenka hamda "Katta dubulg‘a" turnirlarining 24 karra g‘olibi Novak Jokovichdan iborat juftlik 1/8 final bosqichida Genri Patten (Buyuk Britaniya) va Katerina Siniakova (Chexiya) tandemiga qarshi kortga chiqdi.

Keskin kechgan uchrashuvda Sabalenka va Jokovich birinchi setda 4:1 hisobida oldinda borayotganiga qaramay, raqiblar muvozanatni tiklashga muvaffaq bo‘lishdi. Natijada chexiyalik va britaniyalik tennischilar 1:4, 4:2, 10:2 (super tay-breyk) hisobida g‘alaba qozonib, chorak finalga yo‘l oldilar.

Shu tariqa, belaruslik va serbiyalik raketka ustalarining juftligi musobaqani birinchi davradayoq yakunladi.

Ma’lumot uchun, 38 yoshli Jokovich ATP reytingida 5-o‘rinni egallab turibdi. U faoliyati davomida 101 ta titulni qo‘lga kiritgan bo‘lib, ulardan 24 tasi "Katta dubulg‘a" turnirlari hisoblanadi (erkaklar o‘rtasidagi rekord natija). Shuningdek, u 2024-yilgi Parij Olimpiadasining oltin, 2008-yilgi Pekin Olimpiadasining bronza medali sohibi va Devis Kubogi (2010) g‘olibi bo‘lgan. Serbiyalik tennischi jahonning birinchi raketkasi sifatida ATP reytingini boshqarish bo‘yicha ham mutlaq rekordchi hisoblanadi.

Sabalenka 27 yoshda bo‘lib, 2024-yilning oktyabr oyidan buyon WTA reytingida birinchi o‘rinni egallab kelmoqda. Sportchi hisobida 23 ta yirik turnirda g‘alaba bor. U to‘rtta "Katta dubulg‘a" turnirlarida — ikki martadan Avstraliya ochiq chempionati (2023, 2024) va AQSh ochiq chempionatida (2024, 2025) zafar quchgan.