Urganch aeroporti yiliga 3,5 million yoʻlovchini qabul qila oladi

Urganch aeroporti yiliga 3,5 million yoʻlovchiga xizmat koʻrsata oladi

Modernizatsiyadan soʻng Urganch xalqaro aeroportining loyihaviy oʻtkazuvchanlik qobiliyatini deyarli uch baravarga — yiliga 1,2 milliondan 3,5 million yoʻlovchigacha oshirish rejalashtirilmoqda.

Bu haqda Podrobno.uz muxbiri ishtirok etgan havo bandargohiga uyushtirilgan press-tur yakunlariga koʻra maʼlum boʻldi.

Urganch aeroporti direktori Oybek Matkarimovning maʼlum qilishicha, asosiy obʼyektlardan biri maydoni qariyb 39 ming kvadrat metr boʻlgan yangi yoʻlovchi terminali boʻladi. Uning oʻtkazuvchanlik qobiliyati soatiga 1,3 ming yoʻlovchini tashkil etadi.

Terminalda xalqaro va ichki yoʻnalishlardagi yoʻlovchilar oqimi ajratiladi, zamonaviy roʻyxatdan oʻtish, koʻrikdan oʻtkazish va bagajni qayta ishlash tizimlari oʻrnatiladi, shuningdek, VIP va CIP zallari, Duty Free va umumiy ovqatlanish shoxobchalari jihozlanadi. Loyihaning umumiy qiymati 242 million dollarni tashkil etadi: shundan 134 million dollari xususiy sherik, 108 million dollari esa davlat hissasiga toʻgʻri keladi.

Shuningdek, Xorazmga haftalik aviareyslar soni 16 tadan 102 taga koʻpaygani xabar qilingan. Rasmiylar transport infratuzilmasining rivojlanishini, jumladan, hududga sayyohlar oqimining oʻsishi bilan bogʻlamoqda.