Urbanizatsiya boʻyicha milliy qoʻmita "Navroʻz" bogʻini saqlab qolish tarafdori boʻlib chiqdi
Urbanizatsiya boʻyicha milliy qoʻmita "Navroʻz" bogʻini saqlab qolishni qoʻllab-quvvatlab chiqdi
Urbanizatsiya va uy-joy bozori boʻyicha milliy qoʻmita ijtimoiy tarmoqlarda Toshkentning ayrim yashil hududlari oʻrnida avtoturargohlar qurilishi hamda jamoat bogʻlarini tashkil etish uchun moʻljallangan hududlarning auktsionga chiqarilishi bilan bogʻliq mavzular faol muhokama qilinayotgan bir paytda bayonot berdi.
Qoʻmita fikriga koʻra, shahar markazidagi mavjud yashil hududlarni qisqartirish hamda aholining sayr qilishi va dam olishi uchun moʻljallangan jamoat joylari oʻrnida kapital obʼyektlar barpo etish mutlaqo maqsadga muvofiq emas. Avtoturargohlar tashkil etilayotganda koʻkalamzorlashtirilgan hududlarning qisqarishiga va piyodalar uchun yaratilgan sharoitlarning yomonlashishiga yoʻl qoʻymaslik lozim.
Qoʻmitaning maʼlum qilishicha, Vazirlar Mahkamasining 2026 yil 28 fevraldagi 83-sonli qaroriga muvofiq, "Navroʻz" bogʻiga tegishli koʻchmas mulk obʼyektlaridan birining yer uchastkasida Toshkent shahri Yunusobod tumanidagi "Matonat" mahallasida maydoni 1,6 gektar boʻlgan jamoat bogʻini tashkil etish koʻzda tutilgan. Ushbu hududda hukumat qaroriga muvofiq jamoat bogʻi tashkil etilishini taʼminlash va undan faqat maqsadli foydalanish zarur.
Bundan avvalroq, yangi xususiylashtirish dasturi doirasida hukumat Sharof Rashidov koʻchasida joylashgan, "Navroʻz" madaniyat va istirohat bogʻining koʻchmas mulki sifatida roʻyxatga olingan ikkita davlat obʼyektini elektron savdolarga chiqargani maʼlum boʻlgan edi. Obʼyektlar ikkita lotga boʻlingan: maydoni 2 gektar boʻlgan birinchi uchastkaning boshlangʻich narxi 436,3 milliard soʻm, maydoni 1,2 gektar boʻlgan ikkinchi lot esa qariyb 223,9 milliard soʻm boshlangʻich narx bilan sotuvga qoʻyilgan.
Milliy qoʻmita yashil hududlarning qisqarishiga yoʻl qoʻymaslik va poytaxt aholisining manfaatlariga rioya qilishni zarur deb hisoblaydi.