Ukrainaga ommaviy hujum: elektr cheklovlari joriy etilmoqda
Rossiya qoʻshinlari 30-sentabr oqshomida Ukrainaning bir qator hududlariga ommaviy hujum qildi. Kiyevda turarjoy va omborlar, Odessada biznes-markaz shikastlangan, Sumida kamida olti kishi jabrlangan. Energetika obyektlariga zarbalar ortidan ayrim hududlarda 1-oktabrdan elektr isteʼmoliga cheklovlar belgilangan.
Ukrainaga keng ko‘lamli hujum: elektr cheklovlari kuchga kirmoqda
DW nashri mahalliy rasmiylar, favqulodda vaziyatlar xizmati va OAVga tayangan holda xabar berishicha, Kiyevning Obolon tumanida dron omborxonalarga kelib urilgan. Goloseyevo tumanida esa uchuvchisiz apparat bo‘laklari yo‘l yaqinidagi ochiq maydonga tushib, daraxtlarning yonishiga sabab bo‘lgan.
Axborot agentliklari ma’lumotiga ko‘ra, Solomenka tumanida Rossiya droni ko‘p qavatli turarjoy binosiga urilgan. Eng katta zarar binoning birinchi qavatidagi kafega yetgan. Portlash to‘lqini va parchalar atrofdagi boshqa muassasalar, xonadonlar derazalari hamda to‘xtab turgan avtomobillarga ham zarar yetkazgan.
Odessada dron biznes-markazga urilgani bildirilgan.
Kiyev viloyatining besh tumanida ham hujum oqibatlari qayd etilgan. Borispol tumanida bir ayol jarohatlangan. Bucha, Obuxov, Fastov va Belaya Serkov tumanlarida turarjoylar hamda avtomobillar shikastlangan. Belaya Serkov tumanida ta’lim muassasasi binosi ham zarar ko‘rgan.
Ukraina Favqulodda vaziyatlar davlat xizmatining Sumi viloyati boshqarmasiga ko‘ra, Rossiya qo‘shinlari Sumi shahriga boshqariladigan aviabombalar bilan zarba bergan. Dastlabki ma’lumotlarda olti kishi jabrlangani aytilgan. Xususiy va ko‘p qavatli uylar shikastlangan, binolardan birining tomida yong‘in chiqqan.
«Ukrenergo» milliy energetika kompaniyasi energetika obyektlariga hujumlar sabab tizimda murakkab vaziyat yuzaga kelganini ma’lum qilgan. Shu bois 1-oktabr kuni Ukrainaning ayrim hududlarida elektr iste’moli cheklanadi.
Sanoat va biznes uchun quvvatdan foydalanish cheklovlari mahalliy vaqt bilan soat 08:00 dan 21:00 gacha amal qiladi. Barcha toifadagi iste’molchilar uchun esa soatbay elektr uzish jadvallari 08:00–11:00 va 16:00–21:00 oralig‘ida qo‘llanadi.
Kiyev va yana uch viloyatda shoshilinch elektr uzish choralari 30-sentabrning o‘zidayoq joriy etilgan.