Ukrainada «Sens Bank» kuzatuv kengashi raisi olti oyga chetlatildi
Ukraina hukumati davlatga qarashli «Sens Bank» kuzatuv kengashi raisi Nikolay Gladishenkoni olti oy muddatga vakolatlarini bajarishdan chetlatdi. Uning nomi mamlakat korrupsiyaga qarshi organlari tomonidan pul mablag‘larini legallashtirish bilan bog‘liq jinoiy sxema yuzasidan olib borilayotgan tergov materiallarida tilga olingan.
Ukrainada «Sens Bank» kuzatuv kengashi raisi olti oyga lavozimidan chetlatildi.
Ukraina hukumati 19-avgust kuni «Sens Bank» davlat banki kuzatuv kengashi raisi Nikolay Gladishenkoni olti oy muddatga o‘z vazifalarini bajarishdan chetlatish to‘g‘risida qaror qabul qildi.
Ukraina Moliya vazirligi matbuot xizmatining xabar berishicha, bu qaror Korrupsiyaga qarshi milliy byuro (KQMB) va Korrupsiyaga qarshi ixtisoslashtirilgan prokuratura (KQIP) tomonidan e’lon qilingan ochiq ma’lumotlar asosida qabul qilingan.
Vazirlik Gladishenkoning vaqtincha chetlatilishi bank kuzatuv kengashining samarali va lozim darajada ishlashiga tahdid solishi mumkin bo‘lgan xavflarni bartaraf etishga qaratilganini ta’kidladi. Xususan, bankdan pul mablag‘larini legallashtirish maqsadida foydalanish ehtimoli bilan bog‘liq xatarlar qayd etilgan.
Shuningdek, Ukraina Vazirlar Mahkamasi «Sens Bank» boshqaruvi raisi Aleksey Stupakni ham lavozimidan chetlatish tashabbusini ilgari surdi.
Ukraina bosh vaziri Sergey Koretskiy korrupsiyaga qarshi organlar oshkor qilgan ma’lumotlar tegishli huquqiy va siyosiy baho olishi kerakligini ta’kidladi. Uning so‘zlariga ko‘ra, «Korrupsiyaga qarshi organlar e’lon qilgan faktlar tegishli baholashni talab qiladi va ular javobsiz qolishi mumkin emas. Ishonch davlat moliya muassasasida faoliyat yuritishning prinsipial shartidir».
Bosh vazir hukumat tergov materiallarida ismlari tilga olingan «Sens Bank»ning boshqa mansabdor shaxslariga nisbatan ham tegishli kadrlar bo‘yicha qarorlar qabul qilinishini kutayotganini bildirdi.
19-avgust kuni KQMB «Sens Bank» kuzatuv kengashi ofisida, jumladan Nikolay Gladishenko bilan bog‘liq joylarda tintuv o‘tkazgani ma’lum bo‘ldi.
O‘sha kuni KQMB va KQIP «Forrest Gamp» deb nomlangan maxsus operatsiya doirasida sobiq energetika va adliya vaziri German Galushchenko uchun garov pulini to‘lash maqsadida mablag‘larni legallashtirish sxemasi fosh etilganini bildirdi.
Tergov ma’lumotlariga ko‘ra, gap 150 million grivna naqd pul haqida bormoqda. Mazkur mablag‘lar bir nechta soxta kompaniyalar hisobvaraqlari orqali qonuniy muomalaga kiritilib, keyin garov puli sifatida to‘lanishi rejalashtirilgan.
KQMB ma’lum qilishicha, jinoiy sxema ishtirokchilari orasida Ukraina prezidenti ofisi rahbari o‘rinbosari, sobiq xalq deputati, davlat banki boshqaruvi raisi va kuzatuv kengashi rahbari hamda boshqa shaxslar bo‘lgan.
OAV ma’lumotlarida prezident ofisi rahbari o‘rinbosari sifatida Irina Mudraya, sobiq deputat sifatida esa Maksim Mikitas nomi keltirilmoqda. Biroq bu shaxslarga oid ma’lumotlar tergov organlarining yakuniy xulosasi emas va ularning aybi sud qarori bilan tasdiqlanmagan.