Ukrainada korrupsiya mojarosi: Zelenskiy o‘z ofisining rahbari o‘rinbosarini ishdan oldi
Ukraina prezidenti Vladimir Zelenskiy o‘z ofisi rahbarining o‘rinbosari Irina Mudrayani lavozimidan ozod etdi. Bu qaror Milliy aksilkorrupsiya byurosi (NABU) tomonidan o‘tkazilgan maxsus operatsiya haqidagi xabarlar ortidan qabul qilindi.
Zelenskiy 19-avgust kuni "Mudraya Irina Romanovna Ukraina prezidenti ofisi rahbari o‘rinbosari lavozimidan ozod etilsin" degan farmonni imzoladi. Qarorning aniq sababi ko‘rsatilmagan bo‘lsa-da, UNIAN nashrining xabar berishicha, bu NABU va SAP (Maxsus aksilkorrupsiya prokuraturasi) tomonidan o‘tkazilgan qo‘shma maxsus operatsiya natijasida bir qator siyosiy arboblar boshchiligidagi jinoiy tashkilot fosh etilganidan keyin sodir bo‘lgan.
Ushbu tashkilotga Ukrainaning amaldagi va sobiq xalq deputatlari, shuningdek, prezident ofisining yuqori martabali amaldorlari va boshqa shaxslar jalb qilingan. NABU aniq ismlarni oshkor etmagan. Biroq, "RBK-Ukraina" manbalariga ko‘ra, ish bo‘yicha ehtimoliy shaxslar ro‘yxatida prezident ofisi rahbari o‘rinbosari Irina Mudraya, xalq deputati Vadim Stolar va sobiq xalq deputati Maksim Mikitas bo‘lishi mumkin. Deputat Aleksey Goncharenko ham Irina Mudrayaning uyida tintuv o‘tkazilayotganini ma’lum qilgan.
**Ukrainadagi korrupsiya mojarolari**
10-noyabr kuni "Energoatom" davlat energetika kompaniyasi atrofidagi keng ko‘lamli korrupsiya sxemasi fosh etilgan edi. Bu janjal markazida Ukrainaning amaldagi hukumatidagi bir nechta vazirlar, prezidentning uzoq yillik safdoshi Timur Mindich va moliyachi Aleksandr Sukerman bo‘lgan. O‘sha kuni huquq-tartibot idoralari Mindichning uyida, "Energoatom"da va Ukraina adliya vaziri German Galushchenkoning manzilida tintuv o‘tkazgan. Mindichning Ukrainani tark etgani aniqlangan.
12-noyabr kuni Zelenskiy adliya vaziri German Galushchenko va energetika vaziri Svetlana Grinchukni ishdan bo‘shatishni talab qildi. Ikkala vazir ham darhol iste’foga chiqish to‘g‘risida ariza yozdi. 13-noyabr kuni esa prezident Mindich va Sukermanga qarshi sanksiyalar joriy etish to‘g‘risidagi farmonni imzoladi.
Ukraina prezidenti ofisining sobiq rahbari Andrey Yermak esa Kiyev shahri yaqinida "Dinastiya" elita majmuasi qurilishida 460 million grivna (10 million dollar)ni legallashtirish ishi bo‘yicha gumonlanmoqda. Siyosatchi unga nisbatan ayblovlarni tan olmagan, uning uyida tintuv o‘tkazilgan. Yermak 14-may kuni tergov izolyatoriga joylashtirilgan. Sud unga 140 million grivna (taxminan 3 million dollar) miqdorida garov puli belgilagan. 18-may kuni tegishli summa yig‘ilgan va Yermak izolyatordan chiqarilgan.