Ukraina yangi takliflar berdi, Uitkoff ularni Rossiyaga olib bormoqda
AQSH prezidentining maxsus vakili Stiv Uitkoff 20-oktabrda Osloda Volodimir Zelenskiy va Yevropa vakillari bilan muzokara oʻtkazdi. Endi u 21-oktabrda Rossiyaga borib, Vladimir Putin bilan uchrashishi kutilmoqda. Amerika tomoni Ukraina ilgari surgan yangi takliflarni Moskva bilan muhokama qilmoqchi.
Ukraina yangi takliflarni ilgari surdi, Uitkoff esa ularni Rossiyaga olib ketmoqda
DW xabariga ko‘ra, safar rejasini TASS manbasi, Norvegiya bosh vaziri Yonas Gar Styore va Finlandiya prezidenti Aleksander Stubb tasdiqlagan. Axios va The New York Times ham bu tashrif haqida yozgan.
Styore va Stubb uchrashuv Sankt-Peterburgda bo‘lishini aytgan. TASS suhbatdoshi esa Uitkoffning Rossiyaga borishini tasdiqlab, uning qaysi shaharga kelishini aniqlamagan.
Oslodagi muzokaralarda Zelenskiy, Uitkoff, Styore va Stubb qatnashgan. Axios ma’lumotiga ko‘ra, Germaniya, Buyuk Britaniya, Fransiya, Polsha va NATO vakillari ham ishtirok etgan. AQShning ikkinchi muzokarachisi, Trampning kuyovi Jared Kushner grippga chalingani sababli, OAV xabarlariga ko‘ra, suhbatga masofadan ulangan.
Uchrashuvda Ukraina uchun xavfsizlik kafolatlari, hududiy masalalar, sanksiyalar va urushdan keyin Yevropada xavfsizlikni ta’minlash tizimi muhokama qilingan.
Finlyandiya prezidenti muzokaralar yakunida ham kelishuvning umumiy shartlari, ham qisqa muddatli maqsadlar bo‘yicha «real siljish»ga erishilganini aytgan. Uning so‘zlariga ko‘ra, muhokama qilingan g‘oyalar 21-oktabrda Sankt-Peterburgda taqdim etiladi.
Reuters bilan ismi oshkor qilinmasligi sharti bilan gaplashgan amerikalik rasmiy Ukraina Osloda yangi g‘oya va takliflarni ilgari surganini bildirgan. U Putin bilan muzokaralardan maqsad Ukraina va Yevropa bilan erishilgan siljishni davom ettirish hamda takliflarni Rossiya tomoni bilan muhokama qilish ekanini aytgan.
Zelenskiy matbuot anjumanida Putin, Tramp va Xitoy rahbari Si Jinpin o‘rtasida Ukraina urushi bo‘yicha ehtimoliy uchrashuv haqidagi xabarlarga ham munosabat bildirgan. Bunday uchrashuvni noyabrda o‘tkazish taklifi haqida avvalroq The Wall Street Journal yozgan edi.
«Agar gap Ukraina va bizning kelajagimiz haqida ketsa, bu faqat biz ham muzokaralar stoli atrofida bo‘lganimizdagina qabul qilinishi mumkin», - degan Ukraina prezidenti.
U avvalroq Corriere della Sera gazetasiga bergan intervyusida ham «keyingi kutilmagan holatlarning oldini olish» uchun ehtimoliy uchrashuv tafsilotlarini bilishni istashini aytgan.