Ukraina saylovlar vaqtida Moskva boʻylab eng yirik hujumini amalga oshirdi
Rossiya hududlari boʻylab 1600 dan ortiq dron uchirilgan – bu urush boshidan buyon kuzatilgan eng keng koʻlamli hujum boʻldi. Kapotnyadagi neftni qayta ishlash zavodida yana yongʻin chiqqan.
Ukraina saylovlar paytida Moskva ustiga eng yirik hujumini uyushtirdi
Rossiya havo hujumidan mudofaa tizimlari Ukraina dronlarining Moskvaga qaratilgan ommaviy hujumini qaytarganini shahar meri Sergey Sobyanin ma’lum qildi. Uning aytishicha, tunda jami 1600 dron hujum qilgan, ulardan 450 tasi Moskvaga yetib kelayotganida urib tushirilgan. «Misli koʻrilmagan hujum saylovni buzish maqsadida rejalashtirilgan edi. Dushman bunga erisha olmadi», – deya qoʻshimcha qilgan Sobyanin.
20-sentabr kuni Rossiyada saylovlarning uchinchi kuni. Butun mamlakatda bo‘lgani kabi Moskvada ham Davlat dumasi deputatlari saylanmoqda. Moskva oblastida esa hudud dumasi uchun ham saylovlar o‘tkazilmoqda. Moskva hukumati portalida shaharda saylovlarning uchinchi kuni «odatiy rejimda boshlangani» xabar qilingan.
Kapotnyadagi Moskva neftni qayta ishlash zavodi (MNPZ) hududida zarar qayd etilgan. Guvohlar olgan foto va videolarda korxona hududida yong‘in chiqqani ko‘rinadi. Bu zavod mamlakatdagi neftni qayta ishlash bo‘yicha eng yirik korxonalar qatoriga kiradi. MNPZ Moskva shahri va Moskva oblasti uchun asosiy yonilg‘i yetkazib beruvchidir. Korxona ilgari ham bir necha bor ukrain dronlari nishoniga aylangan.
Astra nashri guvohlar olgan foto va videolarni tahlil qilib, ushbu zavodga zarbalardan biri Rossiyaning «Pansir» zenit-raketa kompleksi faoliyati oqibatida berilgan bo‘lishi mumkinligini taxmin qilgan.
Dronlardan biri Moskvadagi turar joy binosiga kelib urilgan. Sobyanin manzilni aniqlashtirmagan, biroq avvalroq u Orexev xiyoboni hududidagi bino zarbaga uchraganini bildirgandi.
Moskva oblasti gubernatori Andrey Vorobevning hisobotida 20-sentabr tongida havo hujumidan mudofaa tizimlari va radioelektron kurash vositalari oblastning 17 ta okrugida ukrainlarning 249 ta dronini zararsizlantirgani aytilgan.
Vorobevga ko‘ra, ikki kishi halok bo‘lgan (Orexovo-Zuyevskiy hamda Ramenskiy okrugida yashovchilar), yana 20 ga yaqin odam jarohat olgan. Jabrlanganlar orasida uch nafar bola ham bor. Jarohatlanganlardan 15 nafari shifoxonaga yotqizilgan, yana olti nafarga voqea joyida tibbiy yordam ko‘rsatilgan.
Uning so‘zlariga ko‘ra, eng og‘ir oqibatlar Ramenskiy okrugida kuzatilgan. Shimoliy shosseda dron 21 qavatli turar joy binosi tomiga urilib, yong‘in chiqargan. 400 kishi evakuatsiya qilingan. 20 ta avtomobil shikastlangan. Sofino qishlog‘ida ukrain droni uch qavatli binoga urilishi natijasida oltita kvartira zarar ko‘rgan.