Ukraina Rossiyaning neftni qayta ishlash zavodlariga zarba berishni qayta boshlaydi, dedi Zelenskiy
Ukraina prezidenti Rossiyaning yangi hujumlari va AQShning Kiyevga bosim oʻtkazish urinishlaridan soʻng uch kunlik tanafsus nihoyasiga yetganini aytdi.
Zelenskiy Ukraina Rossiyaning neftni qayta ishlash zavodlariga hujumlarni qayta boshlashini aytdi
Ukraina Rossiyaning neftni qayta ishlash zavodlariga zarba berishni qayta boshlaydi, dedi Vladimir Zelenskiy va shu bilan birga AQShni muhim qoʻllab-quvvatlashni toʻxtatganlikda aybladi.
Ukraina prezidenti Rossiya Ukrainaning energetika infrastrukturasiga zarba berishda davom etganiga qaramay, Vashingtonning iltimosiga koʻra bunday hujumlarni uch kunga toʻxtatib turganini aytdi. «Biz tugatdik», — dedi u Financial Times nashriga.
Zelenskiy, shuningdek, AQShni Rossiya dizel yoqilgʻisini import qilish boʻyicha kelishuv tuzganidan soʻng, Kiyevni hujumlarni butunlay toʻxtatishga majburlash maqsadida Rossiya zarbalari boʻyicha razvedka maʼlumotlarini almashishni toʻxtatib qoʻyganlikda va Ukraina harbiylari foydalanadigan Starlink sunʼiy yoʻldosh xizmatlarini sekinlashtirganlikda aybladi.
U avvalroq, agar Moskva ham amal qilsa, yakshanba kuni AQSh prezidenti Donald Tramp tomonidan eʼlon qilingan «energetika sulhi»ni qabul qilishini aytgan edi.
Ammo Zelenskiyning aytishicha, Rossiya taklif qilingan kelishuvni eʼlon qilinganidan keyin bir necha soat ichida eʼtiborsiz qoldirdi va bergan zarbalari oqibatida yuz minglab ukrainaliklar elektr energiyasiz qoldi. Kreml bu kelishuvga rozi boʻlganini hech qachon aytmagan.
Chorshanba oqshomida Pirs Morganning savoliga javob berar ekan, Zelenskiy Vashington qoʻllab-quvvatlashning asosiy qismlarini qaytarib olganidan keyin oʻzini AQSh tomonidan xochlanganday his qilganini aytdi.
Ukraina yetakchisi FT nashriga maʼlum qilishicha, amerikalik hamkasblari Ukraina rasmiylariga «agar siz [zarbalarni] toʻxtatmasangiz, biz razvedka maʼlumotlarini bloklaymiz» deb aytgan.
Ukraina harbiylari havo mudofaasini tashkil qilish va muvaffaqiyatli zarbalarni cheklashga yordam berish uchun Rossiyaning havo hujumlari haqidagi AQShning erta ogohlantirish signallariga tayanadi, Starlink internet aloqasi esa butun urush harakatlarida qoʻllaniladi.
Starlink xizmatlarining sekinlashishiga texnik nosozlik sabab boʻlgani haqida taxminlar bor edi — kompaniya egasi Ilon Mask buni rad etgandek boʻldi va buning oʻrniga Tramp maʼmuriyatini shaʼma qildi.
«Bu texnik muammo emas edi, bu xohish edi», — dedi Zelenskiy Londonda boʻlib turganida FT nashriga.
Uning aytishicha, agar AQSh koʻproq Patriot havo hujumidan mudofaa raketalarini yetkazib bersagina, u Rossiyaning neft infrastrukturasiga berilayotgan zarbalarni toʻxtatadi — Kiyev bu zarbalarni Rossiya urush mashinasining daromad manbalarini kesish uchun juda muhim deb hisoblaydi.
Oxirgi paytlardagiga qaraganda ancha dadil tonni egallagan Ukraina prezidenti nashrga amerikalik hamkasbining Rossiya prezidenti Vladimir Putin kabi avtokratik yetakchilarga xayrixohligi borligini aytdi.
Uning taʼkidlashicha, oʻtgan haftadagi voqealarni hisobga olganda, AQSh-Ukraina munosabatlarini tiklash uning vazifasi emas. «Biz hech qanday munosabatlarni vayron qilganimiz yoʻq».