Ukraina jang maydoni maʼlumotlarini Britaniya bilan boʻlishadi
Ukraina va Buyuk Britaniya sunʼiy intellektdan harbiy maqsadlarda foydalanish boʻyicha hamkorlik toʻgʻrisida kelishuv imzoladi. Unga koʻra, Kiyev Rossiya bosqiniga qarshi urush davomida toʻplangan millionlab jang maydoni videolarini Londonga taqdim etadi. Ushbu maʼlumotlar sunʼiy intellekt tizimlarini oʻqitish hamda harbiy obyektlar, aeroportlar, temiryoʻl tarmoqlari va elektr stansiyalarini dronlardan himoya qilish texnologiyalarini rivojlantirishda qoʻllanadi.
Ukraina jang maydonidagi maʼlumotlarni Britaniyaga taqdim etadi.
24-avgust kuni Kiyevda boʻlib oʻtgan «Koʻngillilar koalitsiyasi» yigʻilishidan soʻng, Buyuk Britaniya bosh vaziri Endi Byornem Ukraina va Britaniya harbiy maqsadlarda sunʼiy intellektdan foydalanish boʻyicha hamkorlik shartnomasini imzolaganini eʼlon qildi.
Ushbu kelishuv Britaniyaga Rossiya hujumlarini qaytarish jarayonida Ukraina tomonidan toʻplangan materiallardan sunʼiy intellekt texnologiyalarini rivojlantirishda foydalanish imkoniyatini beradi.
Britaniya bosh vazirining soʻzlariga koʻra, bu hamkorlik Ukrainaning «tengsiz jang tajribasi»ni Buyuk Britaniyaning «jahon darajasidagi sunʼiy intellekt ekotizimi» bilan birlashtiradi.
Ukrainadagi harbiy harakatlar davomida toʻplangan maʼlumotlar Britaniyada sinovdan oʻtkaziladi. Ulardan harbiy bazalar, aeroportlar, temiryoʻl tarmoqlari, elektr stansiyalari va qamoqxonalar kabi muhim obyektlarni uchuvchisiz uchish apparatlaridan himoya qilish tizimlarini takomillashtirishda foydalanish rejalashtirilgan.
Hamkorlik doirasida Kiyev Londonga jang maydonidan olingan millionlab videoyozuvlarni taqdim etadi.
«Avenger» («Qasoskor») nomi bilan yuritiladigan ushbu maʼlumotlar toʻplami hozirda Ukrainaning avtonom dronlarini boshqarishga moʻljallangan sunʼiy intellekt tizimlarini oʻqitishda qoʻllanilmoqda.
Britaniya tomoni bu maʼlumotlarni sunʼiy intellektni harbiy sharoitlarga moslashtirish uchun oʻta qimmatli manba sifatida baholadi.
Jang maydonida olingan videolar sunʼiy intellekt modellariga dronlar, harbiy texnika, harakatlanayotgan nishonlar va turli tahdidlarni real sharoitda aniqlashni oʻrgatish imkonini berishi mumkin.
Ukraina maʼlumotlar taqdim etishi evaziga Buyuk Britaniya Kiyevga texnologiyalar sohasida qoʻshimcha koʻmak koʻrsatadi.
Bunda Britaniya universitetlari, olimlari va texnologik kompaniyalarining imkoniyatlaridan foydalanish, shuningdek, mamlakatning sunʼiy intellekt ekotizimini Ukraina bilan hamkorlikka jalb qilish rejalashtirilgan.
Byornemning taʼkidlashicha, hamkorlik nafaqat milliy xavfsizlik imkoniyatlarini kuchaytiradi, balki muhim infratuzilmani yaxshiroq himoya qilish va iqtisodiy oʻsishga xizmat qiluvchi texnologiyalarni tezroq rivojlantirish imkonini beradi.