Ukraina hujumlaridan keyin Ozon aksiyalari tushib ketdi. Peskov Rossiya javob qaytarishini va’da qildi

Ukraina hujumlaridan so‘ng Ozon aksiyalari narxi tushib ketdi, Kreml javob zarbalari berilishini va’da qildi.

Moskva birjasida asosiy savdo sessiyasi boshlanishi bilan Ozon aksiyalari narxi 28,5 foizga pasayib, 2129 rublni tashkil etdi. Shu bilan birga, Moskva birjasi indeksi savdolar boshida 2092 punktgacha tushdi, bu avvalgi savdo sessiyasi yakunidagi ko‘rsatkichdan 2 foizga kamdir.

Bu holat Ukraina harbiylari Rossiyaning turli hududlaridagi Ozon omborlariga ketma-ket uchinchi kundan buyon zarbalar berayotgani fonida yuz bermoqda. Ozon aksiyalari Rossiya fond bozoridagi eng yirik va likvid qimmatli qog‘ozlar hisoblash bazasiga kiritilgan.

Avvalroq Ukraina Qurolli kuchlari Rossiyaning yana bir yirik marketpleysi — Wildberries omborlariga ham bir necha bor zarbalar bergan edi. Biroq, Ozon’dan farqli o‘laroq, Wildberries aksiyalari birjada savdoga chiqarilmagan.

Rossiya prezidenti matbuot kotibi Dmitriy Peskov Ozon omborlariga uyushtirilgan hujumlarga javoban Rossiya qo‘shinlari Ukraina hududiga yangi zarbalar berishini ma’lum qildi. U jurnalistlarning savollariga javoban: “Kiyev javoblarni har kuni, har kecha his qilmoqda va bundan keyin ham his qiladi”, dedi.

Peskov, shuningdek, Vladimir Putinning intervyusidan iqtibos keltirib, Kiyev Rossiyadagi “fuqarolik obyektlari va logistika infratuzilmasiga” zarba berish orqali “Pandora qutisini ochgani, jinni shishadan chiqarib yuborgani”ni ta’kidladi. Rossiya prezidenti matbuot kotibining so‘zlariga ko‘ra, Ukraina dronlarining bunday hujumlari frontdagi, “hamma kuzatayotgan” jarayonlar dinamikasiga hech qanday ta’sir ko‘rsata olmaydi.

**Wildberries’ga hujumlar tafsilotlari**

Ukraina 18-iyuldan boshlab Moskva yaqinidagi Elektrostal (250 ming kvadrat metr), Tambov viloyatining Kotovsk (108 ming kvadrat metr), Krasnodar (100 ming kvadrat metr), Stavropol o‘lkasining Nevinnomissk (94 ming kvadrat metr) shaharlari, shuningdek, Sankt-Peterburg, Leningrad viloyati va Ryazan shaharlaridagi Wildberries majmualariga hujum qilgan.

Omborlardagi tovarlarning aksariyati kredit hisobiga sotib olingan bo‘lib, ular uchun soliqlar to‘langan, yetkazib beruvchilar oldidagi majburiyatlar esa saqlanib qolgan. Ukraina prezidenti Vladimir Zelenskiy Wildberries’ga qilingan hujumlarni omborlarda dronlar va navigatsiya uskunalari uchun qismlar saqlangani bilan izohlagan edi.

Wildberries Ukraina hujumlaridan zarar ko‘rgan sotuvchilarga kompensatsiya to‘lashni boshlagan. Kompaniya ofertasida marketpleys dron hujumlari uchun javobgarlikdan ozod etilgan bo‘lsa-da, kompaniya rahbari Tatyana Kim “sotuvchilarni tashlab qo‘ymasliklari”ni aytdi. Iqtisodiy zarar kamida 180 milliard rublga baholanmoqda. Shu bilan birga, avvalroq Wildberries dron hujumlari sababli Qozog‘istonda ombor izlayotgani haqida xabar berilgandi.