Ukraina byudjetida 23 mlrd yevrolik mudofaa taqchilligi yuzaga keldi
Ukraina Oliy Radasi joriy haftada davlat byudjeti taqchilligini moliyalashtirish va xalqaro hamkorlardan milliardlab dollar mablagʻ jalb qilish bilan bogʻliq yettita qonun loyihasini koʻrib chiqadi. Prezident Volodimir Zelenskiy ayrim qarorlar «qiyin, yoqimsiz va ommabop boʻlmasligi» mumkinligini aytdi.
Ukraina byudjetida mudofaa yoʻnalishi boʻyicha 23 mlrd yevrolik taqchillik yuzaga keldi
Ukraina prezidenti Volodimir Zelenskiy 15-sentabr kuni Oliy Rada kun tartibiga davlat byudjeti taqchilligini qoplash uchun zarur boʻlgan yettita qonun loyihasi kiritilganini bildirdi. Ularning aksariyati birinchi oʻqishda koʻrib chiqilishi rejalashtirilgan.
Zelenskiyning aytishicha, bu hujjatlarning qabul qilinishi Ukrainaning xalqaro hamkorlardan moliyaviy yordam olishi bilan bevosita bogʻliq. Uning taʼkidlashicha, ijobiy ovoz berishlar mamlakatga milliardlab dollar mablagʻ jalb qilish imkonini beradi.
Prezident ayrim tashabbuslar «qiyin, yoqimsiz va ommabop boʻlmasligi» mumkinligini ham tan oldi. Uning soʻzlariga koʻra, hozirgi vaziyatda bunday qarorlar mudofaa ehtiyojlarini taʼminlash va mamlakatning tiklanish imkoniyatlarini saqlab qolish uchun zarur.
Ukraina Oliy Radasining rasmiy maʼlumotiga koʻra, mamlakat byudjeti xavfsizlik va mudofaa xarajatlarini moliyalashtirishda qariyb 23 mlrd yevro miqdoridagi taqchillikka duch kelgan.
Taqchillikni yopishning asosiy yoʻllari sifatida hamkor davlatlardan qurol-yarogʻ shaklida toʻgʻridan toʻgʻri yordam olish va xalqaro moliyaviy koʻmakni jalb qilish koʻrib chiqilmoqda.
Rada maʼlumotiga koʻra, Ukrainaning xalqaro majburiyatlari bilan bogʻliq qonun loyihalari parlament tomonidan qoʻllab-quvvatlansa, mamlakat yaqin vaqt ichida 12 mlrd dollardan ortiq mablagʻ olishi mumkin.
Zelenskiy avgust oyida Ukraina Mudofaa vazirligi byudjeti taqchilligini 27 mlrd dollar - 23 mlrd yevrodan ortiq miqdorda baholagan edi. Kiyev bu mablagʻlarni harbiy xizmatchilar va ijtimoiy toʻlovlar, qurol-yarogʻ xaridi hamda boshqa mudofaa ehtiyojlarini moliyalashtirish uchun jalb qilishga urinmoqda.