Ukraina AQSH va Yevropa bilan hamkorlikda urushni toʻxtatish rejasini ishlab chiqdi – Zelenskiy
Rossiya jangovar harakatlarni davom ettirishga bir necha bor vaʼda berganiga qaramay, reja ishlab chiqilgan.
Ukraina Prezidenti Volodimir Zelenskiyning 23-avgust kuni maʼlum qilishicha, Rossiya jangovar harakatlarni davom ettirishga vaʼda berayotganiga qaramay, Ukraina AQSH va Yevropadagi hamkorlari bilan birgalikda urushni toʻxtatish boʻyicha takliflar toʻplamini ishlab chiqqan. Bu haqda The Times nashri xabar berdi.
Zelenskiyning soʻzlariga koʻra, Kiyev ushbu reja ustida AQSH Prezidenti Donald Tramp vakillari va Yevropa rasmiylari bilan hamkorlikda ishlagan. Reja oʻt ochishni toʻxtatish, Rossiya va Ukraina qoʻshinlarini front chizigʻidan oʻzaro olib chiqib ketish hamda bufer hudud yaratishni oʻz ichiga oladi.
"Bizga maʼlum boʻlishicha, Amerika tomonida yana bir nechta gʻoya bor. Ular bu gʻoyalarni taqdim etish uchun qulay fursat topmoqchi. Biz ularni kutmoqdamiz", – deya qoʻshimcha qildi Zelenskiy.
Nashr maʼlumotlariga koʻra, 24-avgust kuni Vatikan diplomati Pol Richard Gallaher Rossiyaga tashrif buyurgan va ushbu takliflarni yetkazishi mumkinligi taxmin qilinmoqda. Uning 25-avgust kuni Rossiya tashqi ishlar vaziri Sergey Lavrov bilan uchrashishi rejalashtirilgan.
Biroq, jurnalistlarning taʼkidlashicha, Rossiya ilgari ham bunday takliflarni rad etgan, shu sababli muzokaralarda jiddiy natijaga erishish umidi pastligicha qolmoqda.
Yaqinda Rossiya tashqi ishlar vaziri Sergey Lavrov Rossiya urushni hozirgi front chizigʻi boʻylab toʻxtatishga rozi boʻlmasligini aytgan edi. Uning soʻzlariga koʻra, bu "natsizmni yenggan bobolar" jasoratini qadrsizlantirgan boʻlardi. U jangovar harakatlarni toʻxtatishga faqat "uzoq muddatli, ishonchli va barqaror kelishuv" sharti bilangina erishish mumkinligini qoʻshimcha qilgan.