Uchta elektropoyezd xaridi uchun 465 mlrd so‘m yo‘naltiriladi
O‘zbekistonda mahalliy yo‘nalishlarda yo‘lovchi tashish hajmini oshirish maqsadida uchta elektropoyezd xarid qilish rejalashtirilmoqda. Loyihaning umumiy qiymati 465,1 mlrd so‘mni tashkil etib, yangi poyezdlar yiliga 2,7 mlndan ortiq yo‘lovchiga xizmat ko‘rsatishi ko‘zda tutilgan.
Uchta elektropoyezd sotib olish uchun 465 milliard so‘m ajratiladi.
Vazirlar Mahkamasi tomonidan "Uchta elektropoyezd xarid qilish" loyihasining texnik-iqtisodiy asoslarini tasdiqlash to‘g‘risidagi qaror loyihasi ishlab chiqildi.
Ushbu hujjat O‘zbekiston Prezidentining 2025-yil 27-dekabrdagi "2030-yilga qadar temiryo‘l transportida mahalliy yo‘nalishlarda yo‘lovchi tashish ko‘rsatkichlarini oshirish chora-tadbirlari to‘g‘risida"gi qarorining ijrosini ta’minlash maqsadida tayyorlangan.
Loyihaga ko‘ra, uchta elektropoyezd xarid qilishning umumiy qiymati 465 milliard 121,9 million so‘mni tashkil etadi. Shundan 408 milliard 243,6 million so‘mi kredit mablag‘lari hisobidan, 56 milliard 878,4 million so‘mi esa "Shahar atrofida yo‘lovchi tashish" MChJning o‘z mablag‘lari hisobidan moliyalashtirilishi rejalashtirilgan.
Sotib olinadigan har bir elektropoyezd oltita vagondan iborat bo‘ladi. Shu tariqa, loyiha doirasida jami 18 ta vagondan iborat uchta elektropoyezd xarid qilinishi ko‘zda tutilgan.
Yangi elektropoyezdlar ishga tushirilgach, yiliga 2 million 702,4 ming nafar yo‘lovchiga xizmat ko‘rsatish imkoniyati yaratilishi kutilmoqda.
Loyiha doirasida mashina va uskunalar uchun 416 milliard 595,6 million so‘m sarflanishi belgilangan. Investitsiya davridagi moliyaviy xarajatlar 48 milliard 13,9 million so‘mni, boshqa xarajatlar esa 512,5 million so‘mni tashkil etadi. Qurilish-montaj ishlari uchun alohida mablag‘ ajratish nazarda tutilmagan.
Shuningdek, loyiha natijasida 13 ta yangi ish o‘rni yaratilishi rejalashtirilgan. Investitsiya davri 9 oy etib belgilangan.
Kredit va boshqa qarz mablag‘larini qaytarish muddati 60 oyni tashkil etadi. Bunda 12 oylik imtiyozli davr nazarda tutilgan.
Qaror loyihasida uchta elektropoyezd xarid qilish loyihasining texnik-iqtisodiy asoslari belgilangan tartibda ishlab chiqilgani va kompleks ekspertizadan o‘tkazilgani qayd etilgan.