Turkmaniston xorijliklar uchun elektron viza va onlayn roʻyxatdan oʻtishni yoʻlga qoʻydi
Elektron viza tizimi yordamida xorijliklar mamlakatga kirish ruxsatnomasini olish uchun hujjatlarni internet orqali yuborishi mumkin.
Turkmaniston xorijliklar uchun elektron viza va onlayn roʻyxatdan oʻtishni ishga tushirdi
Turkmaniston Davlat migratsiya xizmati (DMX) elektron viza tizimi hamda chet el fuqarolarini onlayn roʻyxatdan oʻtkazish portalini ishga tushirdi.
Davlat migratsiya xizmatida yangi raqamli xizmatlar taqdimoti oʻtkazildi. Tadbirda Turkmanistonda akkreditatsiyadan oʻtgan xorijiy diplomatik vakolatxonalar rahbarlari qatnashdi. Turkmanistonning xorijdagi elchilari esa uchrashuvga videoaloqa orqali ulandi.
Elektron viza tizimi migration.gov.tm portali negizida ishlaydi. U orqali xorijliklar mamlakatga kirish ruxsatnomasini olish uchun hujjatlarni internet orqali yuborishi mumkin. Migratsiya xizmatining rasmiy portali idoraning alohida raqamli xizmati sifatida faoliyat yuritadi.
Shuningdek, xorijiy fuqarolarni onlayn roʻyxatdan oʻtkazish uchun moʻljallangan rgstr.migration.gov.tm sayti ham ishga tushirildi. Bu platforma orqali sayyohlar, tadbirkorlar va diplomatlar migratsiya hisobiga qoʻyish uchun hujjatlarni topshirishlari mumkin.
Rasmiylar migratsiya tartib-taomillarini elektron shaklga oʻtkazish hujjatlarni rasmiylashtirish muddatini qisqartirishi va qogʻozbozlikni kamaytirishini taʼkidlamoqda.
Elektron viza joriy etilishidan oldin Turkmanistonga turistik safar qilish uchun xorijliklar odatda qabul qiluvchi tomon yoki turoperator orqali oldindan taklifnoma olishi, keyin esa viza rasmiylashtirishi kerak edi. 2025-yil aprel oyida «Migratsiya toʻgʻrisida»gi qonunga elektron viza olish uchun taklifnoma talab qilinmaydigan oʻzgartirishlar kiritildi. Shu bilan birga, rasmiylar hozircha yangi tizimning ishlash shartlari, jumladan, e-Visa narxi, koʻrib chiqish muddati va zarur hujjatlarning toʻliq roʻyxatini ochiq eʼlon qilgani yoʻq.