Turkiyaning Pegasus loukosteri O‘zbekistonning uchta shahriga ucha boshlaydi

Turkiyaning Pegasus loukosteri O‘zbekistonning uchta shahriga parvozlarni boshlaydi

Turkiyaning Pegasus Airlines arzon aviatashuvchisi Istanbul bilan O‘zbekistonning uch shahri — Buxoro, Andijon va Termiz o‘rtasida muntazam yo‘lovchi qatnovlarini yo‘lga qo‘yishni rejalashtirmoqda.

Kompaniya uchta yangi yo‘nalish ochilishini ma’lum qilgan.

Yangi yo‘nalishlar haqidagi ma’lumotlar aviakompaniya saytida ham e’lon qilingan bo‘lib, unda Istanbuldan Buxoro, Andijon va Termizga chiptalar savdosi 99 dollardan (soliqlarni hisobga olgan holda 89,99 yevrodan) boshlangan. Yakuniy narxlar yo‘nalish, parvoz sanasi va bo‘sh o‘rinlar soniga qarab o‘zgaradi.

Parvozlar Pegasus Airlines’ning asosiy tranzit markazlaridan biri bo‘lgan Istanbuldagi Sabiha Go‘kchen aeroporti orqali amalga oshirilishi kutilmoqda.

Yangi yo‘nalishlarning ishga tushirilishi O‘zbekiston viloyatlaridagi yo‘lovchilarga Toshkentga bormasdan turib, Pegasus orqali Yevropa shaharlariga, jumladan, London, Manchester, Parij va Pragaga tranzit reyslardan foydalanish imkonini beradi.

Shu bilan birga, loukosterning tarif siyosati xususiyatlarini ham hisobga olish kerak. Eng arzon xalqaro Light tarifida bepul ro‘yxatdan o‘tkaziladigan bagaj ham, standart qo‘l yuki ham nazarda tutilmagan. Yo‘lovchi faqat o‘rindiq ostiga joylashtiriladigan, og‘irligi 3 kg gacha va o‘lchami 40×30×15 sm dan oshmaydigan kichik sumkani bepul olib chiqishi mumkin.

Qo‘shimcha bagaj uchun alohida to‘lov olinadi.

Pegasus’ning O‘zbekiston bozoriga kirishi aviatsiya ma’muriyati hujjatlari bilan ham tasdiqlangan.

Fuqaro aviatsiyasi agentligining rasmiy reyestriga ko‘ra, 2026-yil 6-oktabrda Turkiya aviakompaniyasi yo‘lovchi tashuvlarini amalga oshirish uchun 58-K-sonli ekspluatatsiya ruxsatnomasini olgan.

Pegasus Airlines’ning O‘zbekiston bozoriga chiqishi masalasi bir necha yildan beri muhokama qilinmoqda.

2019-yil may oyida Turizmni rivojlantirish davlat qo‘mitasi vakillari O‘zbekistonga parvozlarni boshlash bo‘yicha turk loukosteri va Gretsiyaning Orange2Fly kompaniyasi bilan muzokaralar olib borilayotganini ma’lum qilgan edi.

2021-yil yanvarida Pegasus O‘zbekistonga yo‘nalishlar ochishdan, xususan, ziyorat turizmini rivojlantirishdan yana manfaatdor ekanini bildirgan. O‘shanda kompaniya vakillari O‘zbekiston delegatsiyasi bilan Sabiha Go‘kchen aeroportining imkoniyatlarini muhokama qilgandi.

Pegasus Airlines — Turkiyaning eng yirik arzon aviatashuvchilaridan biri. Kompaniya ichki va xalqaro reyslarni, jumladan, Yevropa, Yaqin Sharq va Markaziy Osiyo davlatlariga parvozlarni amalga oshiradi.