Turkiyadan ko‘chib ketgan turdizi yulduzlari hozir qayerda yashaydi?
Turkiya seriallarining mashhur yulduzlari hozir qayerda istiqomat qilmoqda?
Turk aktyorlari, o‘zlarining yuksak shuhratiga qaramay, oddiy insonlar kabi hayot kechirishadi. Ular nafaqat sayohat qilishlari, balki bir joydan ikkinchi joyga ko‘chib o‘tishlari ham mumkin. Quyida xorijga ko‘chib o‘tishga qaror qilgan va hozirda ikki mamlakatda yashayotgan ayrim turk aktyorlari haqida ma’lumot beramiz. Shuni ta’kidlash joizki, ularning hech biri o‘z vatanini yomonlamagan.
**Mehmet Gunsur**
Mehmet Turkiyada tug‘ilib o‘sgan va ta’lim olgan. Biroq, faoliyatining boshida u ko‘proq Italiyada suratga tushgan. Aynan shu mamlakatda u bo‘lajak rafiqasi Katerina Monjio bilan tanishgan. Oilaviy hayot qurishga qaror qilgan juftlik doimiy ravishda Italiyada yashashga kelishib olgan. Shu bilan birga, ularning Turkiyada ham shaxsiy mulki bor. Mehmet vataniga nafaqat yangi filmlarda suratga tushish, balki oilasi va do‘stlari bilan uchrashish uchun ham tez-tez kelib turadi. Ular Katerina bilan birga uch farzandni – qizlari Maya va Xloya hamda o‘g‘li Alini tarbiyalamoqda. Turk aktyorining o‘zi avvalroq bir necha bor Turkiyani hamisha o‘z vatani deb bilishini, biroq oilaviy qulay hayot uchun Rim unga ko‘proq mos kelishini aytgan edi.
**Jan Yaman**
Jan Yaman so‘nggi bir necha yildan beri Italiyada baxtli hayot kechirmoqda. U xalqaro loyihalarda faol ishtirok etmoqda, turli tadbirlarda qatnashmoqda va ko‘chib o‘tganidan zarracha ham afsuslanmaydi. Ayrim turk jurnalistlari aktyorni vatanini mensimayotganlikda ayblashga uringan bo‘lsa-da, u bunday gap-so‘zlarni keskin rad etadi. Jan har doim o‘z mamlakatini sevishini va u bilan aloqalarni uzish niyati yo‘qligini ta’kidlaydi. Ishi nihoyatda tig‘iz bo‘lishiga qaramay, Turkiyaga muntazam kelib turadi, chunki bu yerda uning oilasi yashaydi va ko‘plab yaqin tanishlari bor.
**Maryam Uzerli**
Ba’zan ijtimoiy tarmoqlarda Maryam sha’niga yozilgan salbiy izohlarga ko‘z tushadi. Ayrim foydalanuvchilarning ta’kidlashicha, “Muhtasham yuz yil” yulduzi endi yirik loyihalarda bosh rollarni ololmasligini anglab yetgach, Turkiyani tark etgan. Ammo bunday sharhlovchilar gohida Uzerlining Germaniyada tug‘ilib o‘sganini butunlay e’tibordan chetda qoldirishadi. U Turkiyada aynan “Muhtasham yuz yil” seriali suratga olinayotgan paytda yashay boshlagan, birinchi qizi tug‘ilishidan oldin esa yana Germaniyaga qaytib ketgan. Ayni paytda aktrisa haqiqatan ham ikki mamlakatda yashab, faol ijod qilmoqda. So‘nggi paytlarda Maryam o‘z hayoti va rejalari haqida juda kam so‘zlaydi, biroq o‘zini sevadigan va o‘zi ham sevsa arziydigan insonni uchratishni orzu qilishini yashirmaydi.
**Halit Ergench va Berguzar Korel**
2022-yil yanvar oyida Halit va Berguzar Londondan uy sotib olganini va farzandlari bilan o‘sha yerda yashashini ma’lum qildi. O‘shanda turk seriallari ishqibozlarining ayrimlari Ergenchni mamlakatdan qochishda aybladi. Biroq aktyorlar shunchaki ikki mamlakatda yashashni rejalashtirganini aytishdi. 2024-yil yozida Halit va Berguzarning farzandlari bilan Turkiyaga doimiy yashash uchun qaytgani ma’lum bo‘ldi. Turk seriallari yulduzlari Angliyadagi ko‘chmas mulkidan voz kechgani yo‘q – ular bo‘sh vaqtlarini u yerda o‘tkazishmoqda. Shu bilan birga, Ergench ham, Korel ham turk filmlari va seriallarida faol suratga tushishda davom etmoqda.
**Ali Atay va Hazal Kaya**
2026-yilning yozida Hazal Kaya kutilmagan xabar bilan muxlislarini hayratda qoldirdi. Turk aktrisasi oilasi bilan Niderlandiyaga ko‘chib ketayotganini ma’lum qildi. Oradan bir necha kun o‘tib, Ali Atay rafiqasining so‘zlarini tasdiqladi va ular bu qadamni ancha vaqtdan beri rejalashtirib kelayotganini aytdi. Ular bu ko‘chish ish bilan bog‘liqligini ta’kidladi: mashhurlar xalqaro loyihalar bilan shug‘ullanuvchi kompaniya ochmoqda. “Bu ikki shaharda yashash degani. Xalqaro loyihalar bilan shug‘ullanish uchun u yerda o‘zimiz orzu qilgan kompaniyaga asos soldik”, degan Hazal.