Turkiya 4 ta gol oʻtkazdi, Zidan hissiyotlariga erk berdi
Millatlar ligasi guruhlarida 2-tur oʻyinlari davom etmoqda. Italiya safarda yirik gʻalabaga erishdi, Fransiya Belgiya bilan oʻyinda qiynaldi.
Turkiya 4 ta gol oʻtkazdi, Zidan hissiyotlarga erk berdi
Fransiya milliy jamoasi Zinedin Zidan qoʻl ostida ikkinchi uchrashuvini oʻtkazdi. 1-turda Turkiya maydonidan qiyin gʻalaba (1:0) bilan qaytgan fransuzlar bu safar Belgiyaga safar qilishdi. Zidan ushbu bahsda bir qator yetakchilarni — Dembele, Olise, Sherki, Yupamekano va Rabio kabi futbolchilarni — zaxirada qoldirdi, Mbappe esa jarohat sabab safdan chiqqan edi. Shu bois koʻpchilik muxlislar uchun uncha tanish boʻlmagan Lukash Da Kunya, Esteban Lepol, Jeremi Jake, Andi Diuf kabi futbolchilar ilk daqiqalardan maydonga tushdi.
Fransuzlar toʻp nazoratini qoʻlga oldi va koʻproq zarba yoʻlladi (10 ga qarshi 18 ta, ulardan 9 tasi darvoza sohasiga toʻgʻri borgan), biroq Mark van Bommel boshqaruvidagi belgiyaliklar ham munosib qarshilik koʻrsatib, bir nechta xavfli vaziyatlar yaratishdi. Masalan, birinchi boʻlimda Kevin de Bryuyne Sharl de Ketelareni boʻsh darvoza qarshisiga chiqargan edi, ammo hujumchi toʻpga moslasha olmadi.
Oxir-oqibat hammasi oʻyin yakunida, 88-daqiqada hal boʻldi: Zidan baribir asosiy tarkib futbolchilariga murojaat qilishga majbur boʻldi va 77-daqiqada Sherki hamda Oliseni maydonga tushirdi. Birinchisi pas berdi, ikkinchisi esa toʻp bilan jarima maydoniga kirib borib, ikki himoyachi yoʻlini toʻsganiga qaramay, toʻpni burchakka aniq yoʻnaltirdi.
Soʻnggi daqiqalarda urilgan gʻalaba golini Zinedin Zidan hissiyot bilan nishonladi. Oʻz qarori toʻgʻri chiqqanidan mamnun boʻlgan murabbiy maydon chetida turgan toʻpni kuch bilan tepib yubordi va oldinga yugurdi.