Trampning matbuot kotibi ishdan ketmoqda

Trampning matbuot kotibi lavozimidan ketmoqda

AQSH prezidenti Donald Trampning matbuot kotibi Kerolayn Levitt o‘z lavozimini tark etishini e’lon qildi. Bu haqda u X ijtimoiy tarmog‘ida ma’lum qildi.

Levittning so‘zlariga ko‘ra, u bu qarorni ikki farzandiga ko‘proq vaqt ajratish maqsadida qabul qilgan. U may oyida ikkinchi farzandi, qizi Viviananini dunyoga keltirgan edi va qisqa ta’tildan so‘ng ishga qaytgan edi. Shuningdek, Levittning ikki yoshli o‘g‘li ham bor.

"Qizim tug‘ilgach, Oq uyga qaytganimda, agar vaqt, energiya va e’tiborimni matbuot kotibi lavozimi talab etadigan darajada ishga bag‘ishlasam, ikki nafar kichik farzandimga munosib ona bo‘la olmasligimni butun qalbim bilan his qildim", deb yozdi Levitt.

U AQSH prezidentiga "alohida ishonch — uning nomidan nutq so‘zlash imkoniyati" uchun minnatdorlik bildirdi. Tramp ham unga Oq uy matbuot kotibi sifatidagi faoliyati uchun minnatdorlik bildirib, uni Oq uydagi "haqiqiy yetakchi" deb atadi. AQSH prezidenti Levittning o‘rniga kim kelishini hozircha ma’lum qilmadi.

Hozirda 28 yoshda bo‘lgan Levitt Oq uyning eng yosh matbuot kotibi hisoblanadi. U, shuningdek, 2024-yilda Trampning saylovoldi kampaniyasi matbuot kotibi bo‘lgan va MAGA (Make America Great Again — "Amerikani yana buyuk qilamiz") harakatining eng ko‘zga ko‘ringan tarafdorlaridan biridir.