Tramp turli xavflar sabab havo mudofaa tizimi himoyasida golf o‘ynamoqda

Tramp golf o‘yinlarini havo mudofaasi tizimi himoyasida o‘tkazmoqda

AQSH prezidenti Donald Tramp endilikda golf o‘ynash chog‘ida armiyaning havo mudofaasi tizimi himoyasidan foydalanmoqda. Bild nashrining xabar berishicha, uning golf maydonidan olingan fotosuratlarda davlat rahbari turgan joydan bir necha metr narida o‘rnatilgan "Avenger" majmuasini ko‘rish mumkin.

"Avenger" majmuasining ishlashini o‘ndan ortiq harbiy xizmatchi ta’minlaydi. Ushbu harbiy texnika "Stinger" raketalari bilan qurollangan bo‘lib, jangovar harakatlar uchun mo‘ljallangan. Amerika OAVlarining ma’lumotlariga ko‘ra, bu tizim dronlarning ehtimoliy hujumlaridan himoyalanish maqsadida joylashtirilgan bo‘lishi mumkin.

Ushbu qo‘shimcha xavfsizlik choralari Trampning avvalroq bir necha bor suiqasd nishoniga aylangani bilan bog‘liq. 2024-yil iyul oyida saylovoldi kampaniyasi davomida mergan uning qulog‘ini jarohatlagan edi. Shuningdek, keyinchalik uning Floridadagi golf maydonida qurollangan shaxs qo‘lga olingan. AQSHning Eronga qarshi urushi fonida rasmiylar Tehron tomonidan qasos olinishi mumkinligidan ham xavotirda.

Yaqinda Trampning golf klubi ustidan uchayotgan samolyotlar to‘xtatilgani haqida xabar berilgan edi. Prezidentning shaxsiy golf klubi joylashgan Bedminster (Nyu-Jersi shtati) havo hududida vaqtinchalik parvozlar cheklangan. 9-avgust kuni ushbu cheklovga rioya qilmagan uchoqlarning yo‘lini to‘sish uchun F-16 qiruvchi samolyotlari jalb etilgan. Natijada fuqaro samolyotlari xavfsiz hududga kuzatib qo‘yilgan.