Tramp Starlink tiklanganini aytdi, Zelenskiy esa bir necha soat avval muammo saqlanayotganini bildirgandi
AQSH prezidenti Donald Tramp SpaceX Ukrainada Starlink sunʼiy yoʻldosh aloqasidan foydalanishga qoʻyilgan cheklovlarni olib tashlaganini maʼlum qildi. Biroq bu bayonotdan bir necha soat avval Volodimir Zelenskiy tizim ishidagi cheklovlar hali bartaraf etilmaganini aytgan edi.
Tramp Starlink qayta ishga tushganini aytdi, Zelenskiy esa bundan bir necha soat oldin muammo hali saqlanayotganini ma’lum qilgandi
DW xabariga ko‘ra, Tramp 22-oktabr kuni jurnalistlar bilan suhbatda Starlink faoliyati tiklanganini aytgan. Biroq u bu masalani SpaceX rahbari Ilon Mask bilan shaxsan muhokama qilgan-qilmaganini oshkor etmagan.
Jurnalistlar The Washington Post xabariga tayangan holda, Trampdan Mask bilan bo‘lgan suhbati haqida so‘rashgan.
«Bunga izoh bermoqchi emasman. Men qo‘ng‘iroq qildimmi yoki boshqa birovmi — farqi yo‘q. Menimcha, muhimi, u yana hammasini tikladi», — degan AQSH prezidenti.
Zelenskiy esa o‘sha kuni, Trampning bayonotidan bir necha soat oldin, oktabr o‘rtalarida joriy etilgan cheklovlardan keyin Starlink ishi hali to‘liq tiklanmaganini bildirgan.
Ukraina Mudofaa vazirligi ma’lumotiga ko‘ra, muammolar 14-oktabrga o‘tar kechasi kuzatila boshlangan. Gap internetda ma’lumot uzatish tezligidan ko‘ra, yuqori tezlikda harakatlanayotgan qurilmalarda sun’iy yo‘ldosh aloqasining ishlamay qolishi haqida bormoqda.
Bu Ukraina qurolli kuchlarining uchuvchisiz apparatlardan foydalanishida qiyinchilik tug‘dirgan. Ukrainalik harbiylar Starlink va harbiy aloqa uchun mo‘ljallangan Starshield imkoniyatlaridan kommunikatsiya hamda dronlarni boshqarishda foydalanadi.
The Telegraph va The Wall Street Journal nashrlari cheklovlarni joriy etish tashabbusi Ilon Maskdan chiqqanini xabar qilgan edi. Ularning manbalariga ko‘ra, tadbirkor bu masalani Pentagon bilan muhokama qilib, uning qo‘llab-quvvatlashiga erishgan. Oq uy esa Ukrainada sun’iy yo‘ldosh tarmog‘i ishini cheklash bo‘yicha ko‘rsatma bermaganini bildirgan.
Oktabr o‘rtalarida Kiev AQSH bilan razvedka ma’lumotlarini almashishda ham muammolarga duch kelganini aytgan. Zelenskiyning so‘zlariga ko‘ra, Ukraina bir necha kecha davomida Rossiya ballistik raketalarni uchirgani haqida hamkorlaridan ogohlantirish olmagan.
Tramp ma’muriyati vakillari bu holatni ob-havo sharoiti va dasturiy ta’minotdagi muammolar bilan izohlagan.
Zelenskiy 18-oktabrda Bloomberg’da e’lon qilingan intervyusida AQSH ma’muriyatining so‘nggi qadamlari Ukrainani taslim bo‘lishga undashga o‘xshayotganini aytgan. Shu bilan birga, u buni amerikalik hamkorlarning aniq maqsadi deb tasdiqlamagan.