Tramp siyosiy mahbuslarni ozod qilish evaziga Rossiyaga qarshi sanksiyalarni yumshatishi mumkin - OAV
Jurnalist Saymon Shusterning soʻzlariga koʻra, bunday sxemani maxsus vakil Jon Koul taklif qilgan. U Belarusda sanksiyalarni yumshatish evaziga 500 ga yaqin siyosiy mahbusni ozod qilishga erishgan.
Tramp siyosiy mahbuslarni ozod qilish evaziga Rossiyaga qarshi sanksiyalarni yumshatishi mumkin - OAV
AQSH prezidenti Donald Tramp siyosiy mahbuslarni ozod qilish sharti bilan Rossiyaga qarshi sanksiyalarni yumshatish gʻoyasini qoʻllab-quvvatladi, deb yozdi jurnalist Saymon Shuster. Uning maʼlumotiga koʻra, bunday sxemani maxsus vakil Jon Koul taklif qilgan. Koul Belarusda sanksiyalarni yumshatish evaziga qariyb 500 nafar siyosiy mahbusni ozod qilishga erishgan.
Shu bilan birga, Vashington va Minsk Belarus kaliysini xarid qilish bo‘yicha yirik kelishuvni muhokama qilmoqda, bu haqda AQSH prezidenti oʻtgan hafta maʼlum qilgandi. Koulning aytishicha, bu muzokaralarda Rossiya ham qatnashmoqda — Yevropa sanksiyalari sabab Belarus kaliysini Rossiya hududi orqali olib chiqishga toʻgʻri keladi.
Shuster yozishicha, Koulning Moskvaga doir rejasi hali dastlabki bosqichda bo‘lib, Rossiya va AQSH o‘rtasidagi muzokaralardagi boshi berk ko‘chadan chiqishga qaratilgan. Jurnalist fikricha, Vladimir Putinda Ukrainaga zarbalarni toʻxtatmasdan turib, amerikaliklar bilan munosabatlarda yaxshi niyat va diplomatik siljish belgilarini ko‘rsatishning oddiy yo‘li paydo bo‘ladi. Mahbuslarni ozod qilish evaziga Vashington Kremlga sanksiyalarni yumshatish va savdo kelishuvlariga qaytishni taklif qilishi mumkin.
Koulning fikricha, bunday kelishuvlar tinchlikka xizmat qiladi, chunki «iqtisodiy aloqalar odatda normallashuvga olib keladi». Ukraina esa bu optimizmga qo‘shilmaydi: prezident Volodimir Zelenskiy The Atlantic jurnalistiga urush tugaguniga qadar Rossiyaga nisbatan sanksiyalarni bekor qilish bo‘yicha har qanday urinishni «toʻsib qoʻyish» uchun qoʻlidan kelgan barcha ishni qilishini aytdi.
Belarus muxolifati yetakchisi Svetlana Tixanovskayaning fikricha, sanksiyalarni bekor qilish evaziga mahbuslarni almashish Rossiya va Belarus hukumatlarini yanada ko‘proq odamlarni garovga olishga undashi mumkin xolos: «Ular har doim koʻproq odamlarni hibsga olishi mumkin, Gʻarb esa sanksiyalarni bekor qilish va bitimlar tuzish orqali bu rejimlarga taʼsir qilish dastaklarini yoʻqotmoqda».
Kreml bilan muzokaralarda Belarus tajribasini qoʻllashni Koulga «Novaya gazeta»ning sobiq bosh muharriri va Tinchlik boʻyicha Nobel mukofoti sovrindori Dmitriy Muratov taklif qilgan — u Shusterdan oʻzini prezidentning maxsus vakili bilan tanishtirishni soʻragan.
Koulda allaqachon Vashington kelajakdagi muzokaralarga kiritishi mumkin boʻlgan Rossiya qamoqxonalaridagi amerikaliklar roʻyxati bor. Muratov bilan birga u rossiyalik siyosiy mahbuslar, jurnalistlar va urushga qarshi pozitsiyasi uchun hukm qilinganlar uchun alohida roʻyxat ham tuzgan. Aniq ismlar hamda AQSH tomonidan qilinishi mumkin boʻlgan yon bosishlar hozircha oshkor etilmagan.