Tramp ikki partiyaviy qarshilikdan keyin reklama uchun soliq toʻlovchilar mablagʻlaridan foydalanishni toʻxtatishini aytdi
Tramp va uning siyosatini targʻib qiluvchi ushbu reklamalar davlat mablagʻlarini siyosiy reklamaga sarflashni taqiqlovchi AQSh qonunlarini buzgan boʻlishi mumkin.
Tramp ikki tomonlama qarshiliklardan keyin reklama uchun soliq toʻlovchilar mablagʻlaridan foydalanishni toʻxtatishini aytdi
Prezident Donald Tramp ikki partiyaning tanqidlaridan soʻng, oʻzi suratga tushgan telekoʻrsatuvlardagi reklamalar uchun AQSh soliq toʻlovchilarining pullaridan foydalanishni toʻxtatishini maʼlum qildi.
«Radikal soʻllar men Buyuk AQShimiz uchun ijobiy targʻibot deb hisoblaydigan reklamalarni olayotganim va ular uchun AQSh pullari bilan toʻlayotganimdan gʻazabda», — deb yozdi u dushanba kuni ijtimoiy tarmoqda.
Tramp buni «ancha standart ish» deb atadi, biroq «Vatanparvarlik reklamalari»ni oʻzi va uning MAGA Inc super siyosiy harakat qoʻmitasi orqali yigʻilgan mablagʻlar hisobidan moliyalashtirishga qaror qilganini qoʻshimcha qildi.
Prezident va uning siyosatini maqtovchi ushbu reklamalar siyosiy reklama uchun davlat mablagʻlaridan foydalanishni taqiqlovchi qoidalar tufayli tanqidlarga va ularning qonuniyligi borasidagi savollarga sabab boʻldi.
Soʻnggi haftalarda oʻndan ortiq reklama roliklari namoyish etildi, ularning baʼzilarida Trampning soliqlarni kamaytirishi, AQSh ishlab chiqarishi hamda qonun va tartibga urgʻu berilgan. Ularda Tramp, shuningdek, «yashirin davlat» va u dushman deb biladigan boshqalarga qarshi chora koʻrishga vaʼda beradi.
Reklamalardan birida Tramp shunday deydi: «Biz kommunistlar, marksistlar va fashistlarni haydab chiqaramiz. Yurtimizdan nafratlanadigan kasal siyosiy sinfni uloqtirib tashlaymiz. Biz soxta OAVni tor-mor etamiz va Amerikani bu yovuzlardan bir yoʻla ozod qilamiz».
Oq uy tanqidlarni rad etib, reklamalarni «maʼrifiy» deb taʼrifladi va ular targʻibot emas, balki ijtimoiy reklama ekanini aytdi.
Unda avvalgi maʼmuriyatlarning reklamalari, jumladan, sobiq prezident Barak Obama davridagi uning sogʻliqni saqlash rejasi haqidagi va sobiq prezident Jo Bayden davridagi odamlarni Covid-19 ga qarshi emlanishga undovchi reklamalar misol qilib keltirilgan.
Biroq, huquqshunoslarning taʼkidlashicha, AQSh hukumatining oʻtmishdagi reklamalari odatda jamoat salomatligi yoki milliy favqulodda vaziyatlarga qaratilgan boʻlgan.
«Yagona maqsadi prezidentni targʻib qilish boʻlgan reklamalarga soliq toʻlovchilar dollarlarini sarflash orqali qanday qonuniy hukumat maqsadiga erishilishini tushunish qiyin», — dedi huquqiy etika boʻyicha ekspert Margaret Dilus-Yukins BBC’ga.
Nyu-Gempshirlik demokrat senator Meggi Xassan maʼmuriyatning reklamalar uchun davlat mablagʻlaridan foydalanishini qoralovchi chora taqdim etdi, biroq u respublikachi tomonidan toʻsib qoʻyildi.
«Senatning fikricha, 2026 yil sentyabr oyida efirga uzatilgan, tarkibida „AQSh hukumati tomonidan toʻlangan“ degan toʻgʻridan-toʻgʻri ibora boʻlgan Prezident Donald Trampni targʻib qiluvchi reklamalar uchun Amerika Qoʻshma Shtatlari hukumati tomonidan pul toʻlanmasligi kerak», — deyiladi hujjatda.
Reklamalar ikkala tomon vakillarining ham tanqidiga uchradi.
Respublikachilarning Senatdagi koʻpchilik yetakchisi Jon Tyun dushanba kuni jurnalistlarga «menga bu xabar yoqadi... lekin u soliq toʻlovchilarning pullari hisobidan toʻlanmasligi kerak», dedi.
Respublikachi senator Jon Kennedi yakshanba kuni CBS News telekanalida siyosatchilar targʻibot reklamalari uchun soliq toʻlovchilarning pullaridan foydalanmasliklari kerakligini aytdi.
«Menimcha, hech bir davlat mulozimi, jumladan, Prezident Tramp, Kristi Noem yoki Jon Kennedi oʻzlari uchun xususiy reklamalarga davlat mablagʻlarini sarflamasligi kerak», — dedi Luiziana shtatidan boʻlgan qonunchi.