Tramp Belarusdan kaliy sotib olishini aytdi, Lukashenko buni imkonsiz deb atadi
Tramp Belarusdan kaliy sotib olishini aytdi, Lukashenko buni imkonsiz deb atadi
AQSH Belarusdan kaliyli o‘g‘itlar xarid qilish bo‘yicha yirik bitim ustida ishlamoqda. Bu haqda prezident Donald Tramp o‘zining Truth Social ijtimoiy tarmog‘ida xabar berdi.
Narx Kanadaga to‘layotganimizdan ancha past bo‘ladi. Bu fermerlarimiz va rancho egalari uchun juda yaxshi yangilik, dedi Tramp.
Biroq Belarus prezidenti Aleksandr Lukashenko ushbu xabardan bir necha soat oldin G‘arb bozorlariga kaliyli o‘g‘itlar yetkazib berish to‘liq tiklansa ham, buni amalga oshira olmasligini aytgan edi. U barcha xomashyo hajmi allaqachon shartnoma asosida band qilinganini ta’kidladi.
Mendagi maʼlumotlarga ko‘ra… biz Sharqqa yuzlana oldik. Amerikaliklar bilan olib borilayotgan muzokaralar buning tasdig‘idir. Bu yerda ko‘pchilik “Ehh, kaliy!” deb bong urmoqda. Biz hatto G‘arb bozorlariga mahsulot yetkazib berishni istagan taqdirimizda ham, bunday hajmga ega emasmiz, hammasi shartnoma qilib bo‘lingan, dedi Lukashenko.
AQSH kaliyli o‘g‘itlarni deyarli to‘liq import qiladi. Ushbu importning qariyb 80 foizi Kanada, yana 12 foizi Rossiya hissasiga to‘g‘ri keladi. Belarus esa dunyodagi eng yirik kaliyli o‘g‘it ishlab chiqaruvchilardan biri bo‘lib, Kanada, Rossiya va Xitoy qatorida turadi.
Shu bilan birga, sanksiyalar sabab uning G‘arb bozorlariga kaliy yetkazib berish imkoniyati cheklangan. Bu sanksiyalar 2020-yilda Belarusdagi norozilik namoyishlarining shafqatsiz bostirilishi va Aleksandr Lukashenkoning Rossiyaning Ukrainaga qarshi urushidagi “ishtiroki” tufayli joriy etilgan.
Donald Tramp ikkinchi muddatga qayta saylanganidan keyin AQSH Lukashenko bilan munosabatlarni yo‘lga qo‘yishni boshladi. Jumladan, Belarus kaliy sanoatiga nisbatan sanksiyalar bekor qilindi. 16-sentyabr kuni AQSH prezidentining maxsus vakili Jon Koulning Minskka navbatdagi tashrifidan so‘ng 25 nafar siyosiy mahbus ozod etildi. Shundan keyin AQSH “Lakokraska” OAJ va “Bellesbumprom” konserniga nisbatan sanksiyalarni bekor qildi. Shu bilan birga, Yevropa Ittifoqi Belarus kaliyi importiga qo‘yilgan cheklovlarni saqlab qolmoqda.