“Tottenhem” “Manchester Siti”ning yana bir futbolchisini o‘z safiga qo’shib oldi — OAV

“Tottenhem” “Manchester Siti”dan yana bir futbolchini ijaraga oldi — OAV xabari

“Tottenhem” “Manchester Siti” hujumchisi Omar Marmushni bir mavsumga ijaraga olish bo‘yicha kelishuvga erishdi. Kelishuvga ko‘ra, London klubi kelasi yili futbolchini 60 million funt evaziga majburiy ravishda sotib oladi.

Misr terma jamoasi a’zosi “Tottenhem”da tibbiy ko‘rikdan o‘tishi bilan transfer rasmiylashtiriladi.

Bu “shporlar”ning bir necha kun ichida “Manchester Siti”dan amalga oshirgan ikkinchi transferi bo‘ladi. Avvalroq jamoa braziliyalik vinger Savinyoni dastlabki 75 million funt evaziga o‘z safiga qo‘shib olgan edi.

Shuningdek, bu London klubining yozgi transferlar oynasidagi faol siyosatining davomi hisoblanadi. “Tottenhem” avvalroq Sandro Tonali, Mateush Fernandesh, Yan Pol van Hekke, Endryu Robertson va Markos Senesini ham tarkibiga qo‘shib olgan.

Marmush uchun 60 million funt to‘lanishi “Manchester Siti”ga futbolchi uchun 2025-yilning yanvarida Frankfurtning “Ayntraxt” klubiga to‘lagan 59 million funtni qaytarish imkonini beradi.

27 yoshli Marmush “Manchester Siti” safida 62 ta uchrashuvda 16 ta gol urgan. Biroq u asosan Erling Holandning o‘rnini bosuvchi futbolchi sifatida maydonga tushgan.

U yakshanba kuni APLning “Bornmut”ga qarshi ilk tur uchrashuvida foydalanilmagan zaxira futbolchisi bo‘lib qoldi. Marmushning klub safidagi so‘nggi o‘yini esa bir hafta avval bo‘lib o‘tgan Angliya Superkubogi bahsiga to‘g‘ri keladi.

“Manchester Siti” uchun ham yozgi transferlar oynasi katta o‘zgarishlar bilan kechmoqda. Marmushning ketishi arafasida Rodri, Bernardo Silva, Jon Stounz, Tijjani Reynders, Natan Ake va Jeyms Trafford jamoani tark etdi. Niko Gonsales ham transfer oynasi yopilishidan oldin klubni tark etishi mumkin.