Toshkentning Lutfiy koʻchasida ajratilgan boʻlaklardagi qoidabuzarliklarni qayd etuvchi kameralar ishga tushdi
Toshkentning Lutfiy koʻchasidagi 2,4 km uzunlikdagi uchastkada «A» ajratilgan va boshqa maxsus boʻlaklarda Yoʻl harakati qoidalari buzilishini aniqlash va qayd etish uchun kameralar foydalanishga topshirildi. Bu haqda 21 oktyabr kuni Yoʻl harakatini tashkil etish markazi xabar berdi.
Toshkentning Lutfiy koʻchasida ajratilgan yoʻlaklardagi qoidabuzarliklarni qayd etuvchi kameralar ishlay boshladi.
Koʻcha qatnov qismining oʻng cheti boʻylab jamoat transporti uchun «A» ajratilgan yoʻlagi, shuningdek, velosipedlar, elektrosamokatlar va boshqa individual harakatlanish vositalari harakati uchun alohida yoʻlaklar tashkil etilgan.
Kameralar ushbu yoʻlaklarda boshqa transport vositalarining belgilangan qoidalarni buzgan holda harakatlanishi, toʻxtashi va toʻxtab turishi holatlarini kuzatib boradi.
Kameralar tomonidan qayd etilgan toʻxtash va toʻxtab turish qoidalarini buzish faktlari boʻyicha qonunchilikda belgilangan tartibda jarimalar rasmiylashtirilmoqda.
Oldin xabar berilganidek, poytaxtda jamoat transporti afzalligini taʼminlash, yoʻl harakati xavfsizligini oshirish va ajratilgan yoʻlaklardan maqsadsiz foydalanishning oldini olishga qaratilgan videonazorat tizimi bosqichma-bosqich joriy etilmoqda.