Toshkentdan Izmirga toʻgʻridan-toʻgʻri aviareyslar yoʻlga qoʻyildi

Toshkentdan Izmirga toʻgʻridan-toʻgʻri reyslar yoʻlga qoʻyildi

SunExpress Toshkent va Izmir oʻrtasida toʻgʻridan-toʻgʻri reyslarni yoʻlga qoʻydi. Endilikda shaharlar oʻrtasida transferlarsiz harakatlanish mumkin, parvoz esa taxminan 5 soat-u 35 daqiqa davom etadi. Bu haqda Toshkentda yangi yoʻnalish taqdimotida maʼlum qilindi.

22 sentyabrdan boshlab aviakompaniya haftasiga uch marta — seshanba, juma va yakshanba kunlari parvozlarni amalga oshirmoqda. Tashishlar Boeing 737 samolyotlarida bajarilmoqda.

Chipta narxi bir tomonga 1,8 mln soʻmdan, borish-kelish esa 3 mln soʻmdan boshlanadi. Narxga 20 kg bagaj va 8 kg qoʻl yuki kiritilgan.

Toʻgʻridan-toʻgʻri aviaqatnov ikki davlat oʻrtasidagi sayohatlarni ham turistlar, ham ish yuzasidan yoʻlga chiquvchi yoʻlovchilar uchun yengillashtirishi kutilmoqda. Shu bilan birga, turistlar tomonidan ushbu yoʻnalishga boʻlgan qiziqish allaqachon ortib bormoqda.

Turizm vazirligi maʼlumotlariga koʻra, yil boshidan buyon Oʻzbekistonga Turkiyadan 17 mingga yaqin turist tashrif buyurgan. Bu oʻtgan yilning shu davriga nisbatan 15 foizga koʻpdir.

SunExpress vakili Maksimilian Gorski Oʻzbekistonni Mustaqillik kuni bilan tabrikladi. U shuningdek, turoperatorlar va APG hamkorlariga hamkorlik uchun minnatdorchilik bildirdi. Bundan tashqari, Gorski aynan shu davrda Toshkent — Izmir reysining yoʻlga qoʻyilishi ramziy maʼnoga ega ekanligini taʼkidladi.

Dastlab SunExpress Turkiya va Germaniya oʻrtasidagi aviaqatnovlarga eʼtibor qaratgan edi. Keyinchalik kompaniya yoʻnalishlar tarmogʻini kengaytirdi. Uch yil avval tashuvchi Izmir va Samarqand oʻrtasida reyslarni ochgan edi. Endilikda Toshkent bilan ham toʻgʻridan-toʻgʻri aloqa paydo boʻldi.

Toshkent va Samarqand aeroportlarida roʻyxatdan oʻtish hozirda bepul. Izmirda esa buning uchun toʻlov undiriladi. Bundan tashqari, yangi yildan boshlab Toshkentda ham pullik roʻyxatdan oʻtishni joriy etish rejalashtirilmoqda.

Salondagi joyni onlayn roʻyxatdan oʻtish paytida bepul tanlash mumkin. Bronni oʻzgartirish qoʻshimcha toʻlov evaziga amalga oshiriladi.

Taomlanish chipta narxiga kiritilmagan. Yoʻlovchilar uni alohida buyurtma qilishlari mumkin. Issiq taomlar asosan Izmirda tayyorlanadi, shu sababli Toshkentdan amalga oshiriladigan reyslarda boshqacha xizmat koʻrsatish formati amal qiladi.

Bitta reysda toʻrttagacha uy hayvonini tashish mumkin. Narx uy hayvonining vazni, hajmi va zotiga bogʻliq. Oʻrtacha hisobda u 80 yevrodan boshlanadi.

Kichik yoshli bolalari boʻlgan yoʻlovchilar uchun beshik koʻzda tutilgan. Uni oldindan agentlik yoki aviakompaniyaning qoʻllab-quvvatlash xizmati orqali band qilish lozim.

Bundan tashqari, SunExpress golf ishqibozlari uchun xizmatlarni taklif etadi. Xususan, golf anjomlari toʻplami bepul tashiladi. Shuningdek, golf-klubgacha transfer va oʻyin uchun joy band qilish koʻzda tutilgan. Tegishli taklif doirasida bepul oʻyin oʻynash ham mumkin.

Aviakompaniya, shuningdek, keyingi yilning boshidan Fargʻona vodiysi aeroportlariga ham reyslarni yoʻlga qoʻyishni koʻrib chiqmoqda.