Toshkentdagi mahallada aholining noroziligidan soʻng derazalardagi panjaralarni demontaj qilish toʻxtatildi
Mirzo Ulugʻbek tumanidagi mahallada turar joy binolaridagi panjaralarni olib tashlash boshlandi. Aholining noroziligidan soʻng Toshkent shahar hokimligi ishlar toʻxtatilgani, harakatlarga oʻzboshimchalik alomatlari boʻyicha baho berilishini maʼlum qildi. Obodonlashtirishning toʻsatdan avj olishi u yoki bu tumanda muntazam ravishda kuzatilmoqda.
Toshkent mahallalaridan birida oynalardagi panjaralarning buzilishi aholi noroziligidan soʻng toʻxtatildi
Toshkentning Mirzo Ulugʻbek tumanidagi mahallalardan birida joylashgan turar joy binolari derazalaridagi panjaralarni demontaj qilish ishlari toʻxtatildi. Bu haqda aholining eʼtirozi va ekspertlarning tanqididan soʻng poytaxt hokimiyati maʼlum qildi.
«Vaziyat poytaxt hokimiyati nazoratida: sodir boʻlgan voqea sabablari va ushbu qaror uchun masʼul shaxslar aniqlanmoqda, vakolat haddidan oshishlik va oʻzboshimchalik belgilari boʻyicha harakatlarga baho berilmoqda
», — deyiladi administratsiya xabarida.
«Tekshiruv yakunlari boʻyicha Mirzo Ulugʻbek tumani hokimiyati tomonidan tegishli choralar koʻriladi, shuningdek, bunday holatlar takrorlanmasligi uchun qadamlar ishlab chiqiladi», — deya ishonch bildirdi hokimiyat.
«Aholining qulayligi, xavfsizligi va huquqlari Toshkent shahar hokimiyati uchun ustuvor ahamiyatga ega. Odamlarning xavfsizligi va ularning mol-mulkiga daxldor qarorlar fuqarolar manfaatlariga zarur eʼtibor bilan qabul qilinishi kerak.
Toshkent hokimiyati bu kabi harakatlarga qarshi va ularning tashabbuskori emas», — deb taʼkidlanadi bayonotda.
11 oktyabr kuni Facebook’dagi «Potrebitel.Uz» jamiyatida «hokimiyat topshirigʻi bilan va koʻp kvartirali uylarni saqlashning yangi qoidalariga tayanib», mahallalardan birida, jumladan, birinchi qavatlarda ham deraza panjaralarini kesish boshlanganidan shikoyat qilishdi. Mansabdorlar, shuningdek, panjaralar oʻrnatish kadastrda koʻzda tutilmaganini daʼvo qilishgan.
«Beshinchi qavatda demontaj qilishga ulgurishdi.
Bu vaqtda birinchi qavat aholisi bu buyruqni bergan mansabdor shaxsni izlab hokimiyatga yugurishdi. Topishdi. Demontajni toʻxtatishni talab qilishdi. Chunki panjaralar — bu uyning xavfsizligi masalasi. Va ularni hech kim kadastrga kiritmaydi. Toʻxtatib qolishga erishildi. Ammo aholi bir oz vaqt oʻtgach, hokimiyat bu masalaga yana qaytishidan xavotirda», — deb yozdi jamiyat administratori Liliya Nikolenko.
«Studiya Arxitekturi i Dizayna» («SAD») arxitektori Mariya Sultanova vaziyatni sharhlar ekan, bir nechta savol berdi.
«1. Shuncha vaqtdan beri nazorat qayerda edi?
Uylardagi panjaralar bir kechada paydo boʻlib qolgani yoʻq. Agar muayyan konstruktsiyalar qoidabuzarliklar bilan oʻrnatilgan boʻlsa, bu qoidabuzarliklar qachon aniqlangan, panjaralar oʻrnatilayotganda qayerga qarashgan edi? Ilgari mulkdorlarga qanday talablar qoʻyilgan edi?» — dedi ekspert.
U koʻp kvartirali uylardan texnik foydalanishni nazorat qilish Qurilish va uy-joy kommunal xoʻjaligi sohasida nazorat qilish inspektsiyasining vazifalariga kirishini eslatdi. «Shuning uchun savol faqat aholiga boʻlmasligi kerak. Agar qoidabuzarliklarga yillar davomida munosabat bildirilmagan boʻlsa, nazorat qiluvchi organlarning ishini ham oʻrganish kerak».
«2
. Aynan nima buzilgan?
„Kadastr boʻyicha emas“ — bu taxminan „bizga shunday deyishdi“ degan bilan bir xil huquqiy aniqlikdagi tushuntirishdir. Deraza oʻrnidagi oddiy panjaraning oʻzi, masalan, terrasani egallab olish kabi kvartiraga maydon qoʻshmaydi. Hududni egallab olish va derazadagi himoya konstruktsiyasi — bu boshqa-boshqa vaziyatlar», — deb yozdi Mariya Sultanova.
«3. Tartib-qoida qani?
Aholi talabni kim, qaysi asosda qoʻyayotganini, aynan nima qilish kerakligini tushunishi kerak. Kvartira egasi qoidani buzgan taqdirda ham, bu mansabdor shaxsga bolgarka bilan harakat qilish huquqini bermaydi. Agar konstruktsiyani haqiqatan ham olib tashlash zarur boʻlsa, odamlarga panjaralarni mustaqil ravishda demontaj qilish va derazalar uchun maqbul himoyani tanlash uchun qonunda koʻzda tutilgan imkoniyat berilishi kerak. Favqulodda vaziyat boʻlmagan taqdirda, bu yerda toʻsatdan harakat qilishning umuman hojati yoʻq».
«4. Biz qaysi vazifani hal qilyapmiz?
Odamlar ichkariga kirib olishdan himoyalanish va bola derazadan tushib ketmasligi uchun panjara oʻrnatishadi. Bu ehtiyojlar demontajdan soʻng yoʻqolib qolmaydi. Ha, ochilmaydigan yaxlit panjara yongʻin paytida qutqarishga xalaqit berishi mumkin. Demak, muayyan yechimni baholash kerak: panjara ochiladimi, qutqarishga xalaqit beradimi, mahkamlagichlar xavfsizmi, u bolalarni qutqarish uchun mosmi», — deb taʼkidladi arxitektor.
«Bolgarka — foydali qurilish instrumenti. Lekin u shaharliklar bilan ishlashning oʻrnini bosolmaydi», — deb taʼkidladi u soʻzi yakunida.
Kayd etish joizki, Toshkentning turli tumanlarida muntazam ravishda obodonlashtirishning toʻsatdan avj olishi kuzatiladi, bu haqda aholi kamdan-kam hollarda ogohlantiriladi, ular bilan maslahatlashishni-ku aytmasa ham boʻladi. Mirzo Ulugʻbek tumani tez-tez OAV sarlavhalariga tushadi.
Masalan, yozda «Turon» mahallasidagi hovlilardan birida toʻsatdan bolalar maydonchasini demontaj qilish boshlandi. Bu yerda barbekyu hududi va favvora qurishmoqchi edi.
Tuman hokimiyati aholi bilan loyihani muhokama qilganini taʼkidladi, ammo aholi buni inkor etdi.
Norozilikdan soʻng loyiha oʻzgartirildi
.
Biroq quruvchilar ilgari yashil hududlar boʻlgan hovlilarning koʻplab joylarini asfalt qilishdi va mahallaga olib boradigan yoʻlni kengaytirishdi, buning oqibatida bu yerda koʻproq mashinalar toʻxtab turadigan boʻldi. 1-uy hovlisida vaʼda qilingan avtoturagoh baribir paydo boʻlmadi. Iltimoslarga qaramay, uy yonida piyodalar yoʻlagi koʻzda tutilmagan.
Piyodalar, jumladan bolalar va bolalar arvachasi boʻlgan ota-onalar mashinalarni aylanib oʻtishga majbur.
Avtomobillar harakatini sekinlashtiradigan sunʼiy gʻovlar olib tashlandi, buning oqibatida koʻplab haydovchilar tezlikni oshirishmoqda. Mahallaga kirish qismida svetoforlar va piyodalar oʻtish joylari boʻlgan toʻlaqonli chorraha yaratishni mansabdorlar rad etishmoqda.
Norozilikka qaramay, turar joy uyi yonida doʻkon qurildi. Toshqin qavatli uyning devorida esa Nikolay Jarskiy muallifligidagi mozaikani «chizib tugatishga» urinishdi va bunga ruxsatnomalar olinganini taʼkidlashdi (ular yoʻq edi). Favvora yakunda boshqa hovlida qurildi, bunda aholi, oʻtkinchilar va yaqin atrofdagi tashkilotlar xodimlari foydalanadigan oʻrindiqlar olib tashlandi.
Hozirda shu tumanda Solar kanali boʻylab sayr qilish hududini barpo etish boshlangan. Qirgʻoqlarni betonlashda ishchilar daraxtlar atrofida joy qoldirishmadi. Ijtimoiy tarmoqlardagi tanqidlardan soʻng daraxt tanalari boʻshatildi. Kelajakda koʻkalamzorlashtirish imkoniyatini istisno etgan va yozda qiziydigan maydonlarni oshirgan holda qirgʻoqlarni betonlashning nima keragi bor, nega tabiatga yoʻnaltirilgan obodonlashtirish usullarini qoʻllash mumkin emas — «Gazeta» bu savollarga javob ololmadi.
Bitta materialda bunday misollarning barchasini sanab oʻtishning iloji yoʻq. Bunday obodonlashtirishni shaharliklar allaqachon «shafqatsiz» deb atashgan, «Obod mahalla» nomi esa yashash muhitining yomonlashuvi bilan assotsiatsiyalanadigan boʻlib qoldi. Odamlar manfaatlari hisobga olinishi va ularning qulayligi haqida qaygʻurilishini eʼlon qila turib, mansabdorlar aholining savollari va takliflarini bir chetga surib, mahallalarni oʻz bilganlaricha «yaxshilashda» davom etmoqdalar.
«Shaharliklar — shunchaki shahardan foydalanuvchilar emas. Ular shaharning egalari.
Ular shu yerda yashaydilar, ular soliq toʻlaydilar, bu soliqlarga davlat mavjud va bu aytib oʻtilgan reformalarning hammasi amalga oshiriladi», — degan edi urbanist Arkadiy Gershman «Gazeta»ga bergan intervyusida. Mansabdorlar oʻzlarining obodonlashtirish ishtiyoqida bu haqiqatni eshitisharmikan?