Toshkentdagi davlat maktabida oyiga 24-29 mln soʻmlik pulli sinflar ochildi
Ixtisoslashgan taʼlim muassasalari agentligi Xorijiy tillarga ixtisoslashtirilgan maktab-internatga hujjat topshirib, imtihondan oʻtolmagan bolalar uchun shu maktabning pulli sinflari ochilgani va bu sinflarga qabul boshlanganini eʼlon qildi. Maʼlum boʻlishicha, Vazirlar Mahkamasi 2024-yildagi yopiq qarori bilan bu amaliyotning huquqiy asosini belgilab bergan. Jamoatchilik faollari qator savollarni oʻrtaga tashlamoqda.
Toshkentda yangi ochilgan Xorijiy tillarga ixtisoslashtirilgan maktab-internatda pullik sinflar tashkil etildi, ularning oylik toʻlovi 24-29 million soʻmni tashkil etadi. Bu haqda Ixtisoslashtirilgan taʼlim muassasalari agentligi 20-avgust kuni rasman eʼlon qildi.
Agentlikning maʼlum qilishicha, pullik sinflarning ochilishi ota-onalardan kelib tushgan koʻplab taklif va talablar bilan izohlangan. Ushbu sinflarga maktabga hujjat topshirib, imtihondan oʻta olmagan bolalar qabul qilinadi.
Toʻlov miqdorlari quyidagicha:
* 1-4-sinflar uchun oyiga 24 million soʻm.
* 5-7-sinflar uchun oyiga 29 million soʻm.
Agar oʻquvchi boshqa hududdan boʻlsa, ota-onalar oyiga qoʻshimcha 3 million soʻm toʻlab, uni maktab yotoqxonasiga joylashtirishlari mumkin.
Ixtisoslashtirilgan taʼlim muassasalari agentligi matbuot kotibi Jahongir Rahmonovning soʻzlariga koʻra, bu masalada ota-onalardan 22 mingdan ortiq murojaat kelib tushgan. Ushbu amaliyotning huquqiy asosi Vazirlar Mahkamasining 2024-yil 30-dekabrdagi 908-sonli qarorida belgilangan. Biroq, bu qaror "xizmat doirasida foydalanish uchun" boʻlganligi sababli, uning mazmunini oshkor etish imkoni yoʻq.
Rahmonovning taʼkidlashicha, imtihondan muvaffaqiyatli oʻtgan oʻquvchilar uchun taʼlim bepul. Maktabda ingliz va xitoy tillari chuqurlashtirilgan holda oʻqitiladi. Oʻquvchilar uchun besh mahal ovqatlanish, sport mashgʻulotlari va til oʻrganish darslari ham mavjud. Ammo pullik sinflar uchun belgilangan narxlarning asoslari nomaʼlum.
Maʼlumot uchun, ixtisoslashtirilgan maktablar davlat tizimidagi taʼlim muassasalari hisoblanadi va davlat byudjetidan moliyalashtiriladi. Maktabga xorijiy taʼlim dasturlari va chet ellik oʻqituvchilarning jalb qilinishi ham byudjet hisobidan amalga oshiriladi.