Toshkentda tigʻiz vaqtlarda jamoat transporti oraliq intervallarini qisqartirish rejalashtirilmoqda: avtobuslar — 3−5 daqiqagacha, metro — 2−3 daqiqagacha
Toshkent xalq deputatlari tigʻiz vaqtlarda avtobus va metro kutish vaqtini qisqartirish boʻyicha choralar koʻrishni topshirdi. Asosiy yoʻnalishlarga qoʻshimcha avtobuslarni, eng gavjum 25 tasiga esa boʻgʻinli avtobuslarni yoʻnaltirish rejalashtirilmoqda. shuningdek, 20 ta avtobus yoʻnalishida harakatni soat 23:00 gacha uzaytirish imkoniyati koʻrib chiqiladi.
Toshkentda tigʻiz vaqtlarda jamoat transporti oraliq intervallarini kamaytirish koʻzlanmoqda: avtobuslarda — 3–5 daqiqagacha, metroda — 2–3 daqiqagacha
Toshkent shahar xalq deputatlari Kengashining 30 oktyabrdagi qarori bilan 15 noyabrdan boshlab tigʻiz vaqtlarda barcha asosiy yoʻnalishlarda avtobuslar harakati intervalini 3–5 daqiqagacha qisqartirish topshirildi.
Buning uchun tigʻiz vaqtlarda — yerttalab soat 7:00 dan 9:30 gacha va kechqurun soat 17:00 dan 19:30 gacha — qoʻshimcha avtobuslarni jalb etish rejalashtirilmoqda.
Jadvallarga rioya etilishini markazlashtirilgan dispetcherlik xizmati va onlayn GPS-monitoring orqali har kuni nazorat qilish topshirildi.
20 dekabrgacha, ayniqsa Uchtepa, Mirobod, Sergeli va Yangihayot tumanlarida yoʻlovchi oqimi yuqori boʻlgan 25 ta markaziy va magistral yoʻnalishlarga katta sigʻimli boʻgʻinli avtobuslarni yuborish tavsiya etildi. Xususan, bu 8, 9T, 14, 18, 24, 28, 38, 44, 46, 51, 57, 58, 67, 72, 85, 91, 93, 98, 110, 115, 118, 122, 131, 147 va 155-sonli yoʻnalishlardir. Qayd etish joizki, ularning baʼzilarida boʻgʻinli avtobuslar allaqachon ishlamoqda.
Metropoliten 20 noyabrgacha Chilonzor, Oʻzbekiston va Yunusobod yoʻnalishlarida, shuningdek, yer usti halqa yoʻnalishida soat 7:30 dan 9:30 gacha, 12:00 dan 14:00 gacha va 17:00 dan 19:30 gacha boʻlgan tigʻiz vaqtlarda tarkiblarni beshta vagondan shakllantirish va harakat intervallarini 2–3 daqiqagacha qisqartirish boʻyicha chora-tadbirlarni belgilashi kerak.
Bundan tashqari, 1 dekabrgacha metropoliten gavjum bekatlarda — yoʻnalishlar oʻrtasidagi oʻtish tugunlarida va eskalatorlar oldida yoʻlovchilar oqimini tartibga solish va xavfsizlikni taʼminlash choralarini koʻrishi zarur.
1 noyabrdan eʼtiboran avtobuslar uchun ajratilgan «A» tasmalarida yengil va shaxsiy transport vositalarining noqonuniy toʻxtab turishi va harakatlanishi ustidan doimiy nazorat kuchaytiriladi.
15 dekabrgacha avtobuslarning oldi qismiga harakat davomida qoidabuzarliklarni avtomatik ravishda qayd etuvchi mobil videokameralarni oʻrnatish va ularni Yoʻl harakati xavfsizligi boshqarmasining yagona bazasiga integratsiya qilish yoʻlga qoʻyilishi kerak.
1 dekabrgacha temir yoʻl vokzallari va avtovokzallarni, aeroportni, metro bekatlarini va aholi zich yashaydigan massivlarni bogʻlaydigan 20 ta yoʻnalishda soat 21:00 dan 23:00 gacha avtobuslar harakatini «mavjud imkoniyatlar doirasida» tashkil etish masalasini koʻrib chiqish topshirildi.
Kechki va jumladan tungi vaqtlarda avtobuslarning harakat intervali 15–20 daqiqadan oshmasligi kerak. shuningdek, bunday qatnovlar jadvalini barcha bekatlarda va raqamli ilovalarda eʼlon qilish hamda ularga rioya etilishi ustidan dispetcherlik nazoratini oʻrnatish topshirildi.
Avtobus haydovchilari ularni bekat maydonchasi bordyuriga jipslashtirib toʻxtatishlari kerak. Undan uzoqda toʻxtash holatlari videokuzatuv orqali kuzatib borilishi, qoidabuzarlarga nisbatan esa intizomiy va moliyaviy choralar qoʻllanilishi topshirildi.
1 dekabrgacha barcha avtobuslar va metro bekatlarida nogironligi boʻlgan shaxslar va bolalar aravachali yoʻlovchilar uchun panduslar va moslamalarning sozligini qayta tekshirish, shuningdek, kamchiliklarni bartaraf etish choralarini koʻrish lozim.
Harakatlanishi cheklangan yoʻlovchilar uchun pandusni ochish haydovchilarning majburiy xizmat vazifasi sifatida mustahkamlanishi kerak. Rad etganlik uchun intizomiy jazolar qoʻllanilishi mumkin.
10 noyabrdan boshlab bekatlarni avtomatik ovozli eʼlon qilish va avtobuslardagi elektron tablolarning poʻlat-toʻliq ishlashini taʼminlash, shuningdek, haydovchilaga eʼlonlarni asossiz oʻchirib qoʻyishni qaʼtiy taqiqlash topshirildi.
Shu sanadan boshlab barcha avtobuslar va metro poyezdlarida mavsum hisobga olingan holda sovitish va isitish tizimlarining uzluksiz ishlashi, shuningdek, mikroklimatning doimiy nazorati taʼminlanishi kerak.
Oktyabr oyida Toshkent metropoliteni uchun 2027 yilgacha 14 ta besh vagonli poyezd (jami 70 ta vagon) xarid qilish rejalashtirilayotgani haqida xabar berilgan edi.