Toshkentda Ruminiyaning «Yuridik fakultet toʻdasi» filmi namoyish etiladi
Tashkent Times — Oʻzbekistonning soʻnggi yangiliklarini yoritib boruvchi ingliz tilidagi onlayn-gazetadir
Toshkentda Ruminiyaning «Yuridik fakultet toʻdasi» filmi namoyish etiladi
2026 yil 25 oktyabr kuni soat 18:00 da Alisher Navoiy nomidagi Oʻzbekiston Milliy kinosanʼati saroyida (Navoiy shohkoʻchasi, 15) Ruminiyaning «Yuridik fakultet toʻdasi» filmi namoyishi boʻlib oʻtadi. Mixaela Anitey rejissyorlik qilgan va Emanuel Parvu stsenariysini yozgan ushbu filmda bosh rollarni Tudor Kuku-Dumitresku va Ileana Puyu ijro etgan. Kartina 2025 yilda ekranlarga chiqqan. Namoyish 11-Yevropa kino festivali doirasida Ruminiyaning Oʻzbekistondagi elchixonasi va Yevropa Ittifoqining Delegatsiyasi tomonidan, Oʻzbekiston Respublikasi Madaniyat vazirligi huzuridagi Kinematografiya agentligi koʻmagida birgalikda tashkil etilmoqda.
Film voqealari jiddiy qiyinchiliklarni boshidan kechiradigan yetti nafar huquqshunoslik talabasi atrofida aylanadi. Bu vaqt sinovidan oʻtgan hamjihatlik, oʻzaro qoʻllab-quvvatlash va haqiqiy doʻstlik haqidagi taʼsirli hikoyadir.
Ruminiyaning Oʻzbekistondagi elchixonasi kinoixlosmandlarini namoyishga taklif etadi. Kirish bepul. Film rumin tilida oʻzbekcha subtitrlar bilan taqdim etiladi.
Oʻzbekiston Ruminiyaning Markaziy Osiyodagi juda qadrli hamkori hisoblanadi va soʻnggi yillarda ikki tomonlama hamkorlik juda muvaffaqiyatli rivojlandi. Ruminiya Oʻzbekiston bilan barcha sohalarda, jumladan, kinematografiya sohasida ham aloqalarni rivojlantirishga katta ahamiyat beradi. Ruminiya elchixonasi Oʻzbekiston Kinematografiya agentligi bilan hamkorlikda Toshkentda ikki marotaba Ruminiya kino kunlarini tashkil etdi. Birinchisi 2022 yilda boʻlib oʻtgan va undan «Mening yonimda» badiiy filmi (rejissyor Teddi Nekulaye) va «Dakiyliklar» tarixiy eposi (rejissyor Serjiu Nikolayesku) oʻrin olgan edi. Rejissyor Nekulaye va aktyor Adrian Padurariu mahalliy kino mutaxassislari bilan uchrashish uchun Toshkentga tashrif buyurgan. Ikkinchisi oʻtgan yili Ruminiya va Oʻzbekiston oʻrtasida diplomatik munosabatlar oʻrnatilganining 30 yilligiga bagʻishlab oʻtkazilgan boʻlib, unda «Kichik askar» (rejissyor Marian Krishan) va «Xoriya» (rejissyor Ana-Mariya Komanesku) filmlari namoyish etilgan. Har ikki tadbir ikki mamlakat oʻrtasidagi madaniy hamkorlikning muhim voqealari sifatida yodda qoldi.
2023 yilda boʻlib oʻtgan «Ipak yoʻli durdonasi» 15-Toshkent xalqaro kinofestivalida Ruminiya ikkita film bilan ishtirok etdi: «Togʻlarni talqon qiluvchi ota» (rejissyor Daniel Sandu) va «Mikado» (rejissyor Emanuel Parvu). Ruminiya, shuningdek, har yili Toshkentda oʻtkaziladigan Frankofoniya kunlari doirasidagi namoyishlarda ham ishtirok etadi, u yerda 2022 va 2025 yillar oraligʻida «Yovoyi Ruminiya», «Shamol izlovchi», «Mariya, Ruminiya yuragi» va «Yaxshi yigitlar jannatga tushadi» kabi filmlar namoyish etilgan.
Oʻtgan yili Ruminiyaning Buxarest va Tekirgyol shaharlarida «Abu Iso Muhammad at-Termiziy: Termizlik alloma» oʻzbek filmi katta muvaffaqiyat bilan namoyish etildi.