Toshkentda maktab oʻquvchisi magnitli bilakuzukni yutishga majburlanganidan keyin reanimatsiyaga tushib qoldi. Video

1 soat oldin

Toshkent shahri Yashnobod tumanidagi 151-maktab oʻquvchisi tengdoshlarining shafqatsiz qilmishidan soʻng murakkab uch soatlik operatsiyani boshdan kechirdi va reanimatsiyaga yotqizildi. Jabrlanuvchining onasi soʻzlariga koʻra, ikki nafar maktab oʻquvchisi uning oʻgʻlini kaltaklash bilan qoʻrqitib, ichagini olti joyidan teshib yuborgan metall magnitli bilakuzukni yutishga majbur qilgan.

Ayol sodir boʻlgan voqea haqida ijtimoiy tarmoqlarda maʼlum qildi.

Uning aytishicha, voqea maktab hojatxonasi yaqinida sodir boʻlgan, u yerda nomaʼlum sinfning ikki nafar oʻquvchisi bolaga hujum qilgan. Bezorilardan qoʻrqqani sababli bola sodir boʻlgan voqeani ota-onasiga darhol aytmagan. U shifoxonaga kuchli ogʻriqlar bilan olib kelingan, shifokorlar esa metall buyumni faqat rentgen tasvirida koʻrishgan. Shundan keyingina jabrlanuvchi maktabda unga nisbatan nima qilishganini tan olgan.

Organizmga tushgan bilakuzuk boʻlaklarga boʻlinib, oksidlanishni boshlagan. Shifokorlar uch soat davomida shoshilinch operatsiya oʻtkazishdi — yot jism ichakni birdaniga olti joyidan shikastlagan, shu sababli shifokorlar aʼzoning taxminan besh santimetrini olib tashlashlariga toʻgʻri kelgan.

Hozirda bola reanimatsiyada qolmoqda, shifokorlarning prognozlariga koʻra, u yerda yana toʻrt-besh kun boʻladi.

Maktab oʻquvchisining onasi ijtimoiy tarmoqlarda videomurojaat eʼlon qilib, ota-onalarni bolalar shafqatsizligi va tarbiyasi muammosiga eʼtibor qaratishga chaqirdi. Ayol hali ham shok holatida ekanini va farzandidan deyarli ayrilib qolayozganini tan oldi, shuningdek, nima uchun ruhiy nazoratga muhtoj bolalar tufayli atrofdagilar azob chekishi kerakligini soʻradi.

Huquq-tartibot idoralari va maktab maʼmuriyatidan hozircha rasmiy izoh berilmadi.