Toshkentda ichiga gashish yashirilgan qoʻgʻirchoq bilan ayol qoʻlga olindi

Toshkentning Bektemir tumanida ichida bolalar oʻyinchogʻiga gashish yashirilgan ayol qoʻlga olindi, deb xabar berdi Oʻzbekiston Ichki ishlar vazirligi matbuot xizmati.

Ushlab olish Toshkent viloyati IIBB Kiberjinoyatlarga qarshi kurashish boshqarmasi va Nurafshon shahar IIB xodimlarining reyd tadbiri davomida amalga oshirildi.

Tezkor xodimlar internetdan olingan xabar asosida Nexia 3 avtoulovini toʻxtatib, 56 yoshli ayolning buyumlarini tekshirishdi.

Paketlardan birida qoʻgʻirchoq bor edi, uning vazni huquq-tartibot idoralari xodimlarida shubha uygʻotdi. Oʻyinchoq ochib koʻrilganda, uning bosh qismidan oʻtkir hidli, toʻq jigarrang rangli, sakkizta oʻramda gashish topildi. Har bir oʻramning vazni 100 grammdan 150 grammgacha edi.

Toshkent viloyati IIBB maʼlumotlariga koʻra, ayol giyohvandlik moddalarini sotish uchun Fargʻona viloyatidan Toshkentga olib kelayotgan boʻlgan.

IIV tomonidan eʼlon qilingan videoda ayol tanishi paketlarni topshirgani uchun 200 dollar berishni vaʼda qilganini aytgan.

IIV Jinoyat kodeksining 273-moddasi 6-qismi (Giyohvandlik vositalari, ularning analoglari yoki psixotrop moddalarni oʻtkazish maqsadini koʻzlab qonunga xilof ravishda tayyorlash, olish, saqlash va boshqa harakatlar qilish, shuningdek ularni qonunga xilof ravishda oʻtkazish juda koʻp miqdorda, shuningdek uyushgan guruh tomonidan yoki uning manfaatlarini koʻzlab, telekommunikatsiya tarmoqlaridan yoki internetdan foydalanib sodir etilgan boʻlsa) boʻyicha jinoyat ishi qoʻzgʻatilganini maʼlum qildi. Modda sanktsiyasi 15 yildan 20 yilgacha ozodlikdan mahrum qilish jazosini nazarda tutadi.

2025 yilning fevral oyida Surxondaryodagi «Ayritom» postida katta miqdordagi giyohvandlik moddasi — supurgi soplari ichida Oʻzbekistonga olib kirishga urinilgan, qiymati 16,5 mln dollardan ortiq boʻlgan 612 kg gashish ushlangan edi.